Marneuli meriyasının 2 iyul tarixində Marneuli bazarı ərazisində
“Evə -Avropaya doğru” kampaniyası çərçivəsində bukletlərin
paylanması
aksiyasına gedərək iştirakçıları təhqir edən əməkdaşı İrma Zarkua
Marneulili mülki fəal Samirə Bayramovaya və daha on nəfərə yaxın
şəxsə qarşı hüquq-mühafizə orqanlarına müraciət edib.
İrma Zarkua “Marneuli” radiosuna müsahibə verməkdən imtina
etdi.
“Şəxsən mənim sizin hansısa sualınızı cavablandırmaq öhdəliyim
yoxdur. Vaxtı gələndə hər şeyi öyrənəcəksiniz. Məndən heç nə öyrənə
bilməyəcəksiniz, çünki sizin televiziyanıza və rəhbərliyinizə
etibar etmirəm”, - İrma Zarkua “Marneuli” radiosunun
jurnalisti ilə söhbət zamanı bildirib.
“Gürcü Arzusu”-nun dəstəkçisi, Marneuli meriyasının əməkdaşı İrma
Zarkua “Marneuli” radiosundan fərqli olaraq, “İmedi” kanalına
müsahibə verib. İmedi kanalında yayımlanmış süjetdə Zarkua bildirir
ki, 2 iyul aksiyasından sonra Samirə Bayramova və onun yaxın
adamları, Zarkuaya hədə məzmunlu, təhqiredici məktublar yazıblar.
Buna görə də o, hüquq-nühafizə orqanlarına müraciət edib.
“Şənbə günü Marneulidə təsadüfən Samirə Bayramova ilə
qarşılaşdım. O, məzmunu mənə aydın olmayan bukletlər paylayırdı.
Onunla mübahisə etdim və o, əli ilə mənə toxundu və iki dəfə mənə
əl vurdu, bunu təsdiq edən videolar da var. Bundan sonra sosial
şəbəkələrdə qısnama həyata keçirilir. Eləcə də təhqiredici mesajlar
göndərirlər. Məhz bununla əlaqədar polisə gedirəm. Dövlət
məmuruyam, ancaq bu söhbət qeyri-iş saatında olub, mən qanunu
pozmurdum. Mənə qarşı şantaj aparılır və psixoloji təzyiq
göstərilir. Ona görə də mən onu polisə şikayət
edəcəyəm”, - Zarkua “İmedi” kanalına verdiyi
müsahibəsində bildirib.
Mülki fəal və hüquq müdafiəçisi Samirə Bayramova “Marneuli” radiosu
ilə söhbəti zamanı bildirdi ki, hüquq-mühafizə orqanl nümayəndələri
hələ ki onunla əlaqə saxlamayıblar. Ona görə də Zarkuanın polisə
konkret olaraq hansı məsələ ilə əlaqədar müraciət etdiyini
bilmir.
“Yalnız mediaya verdi müsahibədən məlumat aldım, yəqin
tezliklə mənə də aydın olacaq. Qeyd etdiyim kimi, 2 iyul
hadisələrindən sonra şikayət verməyə qərar vermişdim. Çünki mənə
özümü ifadə etməkdə və söz azadlığında mane olub. Onların üzündən
Marneuli bazarında planlaşdırılmış görüşü sona qədər davam etdirə
bilmədik. Həmçinin, bu adamlar tərəfindən psixoloji və şifahi
təhqirin qurbanı olduq. Amma mən bunların hamısına baxmayaraq,
qadın həmrəyliyi göstərdim və ərizə vermədim. Buna baxmayaraq, İrma
Zarkua məni təhqir etməyə başladı, artıq şəxsi faciəmlə mənim
alçaltmaq istəyirdi. Ondan sonra qərar verdim ki, bu adamı şikayət
edim. O, bu məsələ ilə bağlı mənim şərhimə baxdıqdan sonra qərar
verib ki, özü də polisə müraciət etsin. Mənim müsahibəm “İmedinin”
efirində yayımlandı və bir saatdan sonra həmin kanalda Zarkuanın
bizi şikayət etdiyini bildirdilər”, - Samirə
Bayramova bildirdi.
Samirə Bayramovanın sözlərinə görə, o, mütləq İrma Zarkuaya qarşı
hüquq-mühafizə orqanıarına müraciət etməyi düşünür. 2 iyul
aksiyasının təşkilatçıları isə ümumi şikayətlə polis orqanına
müraciət etməyi düşünürlər.
“Marneuli” radiosu hansı maddəyə əsasən istintaq aparıldığı barədə
Daxili İşlər Nazirliyindən cavab gözləyir. Məlumat aldıqdan sonra
material yenilənəcək.
Qeyd edək ki, “Evə - Avropaya doğru” hərəkatı 2 iyul tarixində
Marneuli bazarı ərazisində əhali ilə görüşüb və bukletlər
paylayırdı. Fəal vətəndaşlar yerli sakinlərlə Avropa dəyərlərindən
və Gürcüstanın Avropa İttifaqına namizədlik statusu qazanması üçün
atmalı olduğu addımlar barədə danışıblar. Bu prosesdə özünüidarə
nümayəndələri mülki fəallara mane olublar.