პარლამენტში პლენარულ სხდომაზე რუსულ კანონს მეორე მოსმენით განიხილავენ.

სხდომის დაწყებამდე დარბაზში დეპუტატებს შორის იყო ხმაური და დაპირისპირება.

როგორც ოპოზიციონერი დეპუტატი, თეონა აქუბარდია ჟურნალისტებს ეუბნება „ოცნების“ კაცი დეპუტატები ქალებს წიგნებს და ბოთლებს ესროდნენ.

მისი თქმით, შალვა პაპუაშვილი სასტიკად ნაცემ ენმ-ს თავმდჯომარესთან, ლევან ხაბეიშვილთან „ყალბი“ წუხილის გამოსახატად მივიდა, რაზეც თინა ბოკუჩავამ უთხრა, რომ „ეს არავის სჭირდებოდა”.

აქუბარდიას თქმით, დიმიტრი ხუნდაძემ დაიწყო წიგნის სროლა, რასაც მოჰყვა უკვე დაპირისპირება.

„ფიზიკური ცემა-ტყეპაა, ქალებს ესვრიან წიგნებს, ბოთლებს… პაპუაშვილი მივიდა ხაბეიშვილთან, უნდოდა ეთქვა, რომ წუხს. შემდეგ თინა ბოკუჩავა მივიდა – შენი წუხილი არავის სჭირდებაო, დაიწყო შემდეგ ჩხუბი, ქალებს ესვრიან ბოთლებს, მიდის ფიზიკური ჭიდაობა. ამ ქვეყანაში აღარ არსებობს აღარც პარლამენტი, აღარც დემოკრატია. ვაჩერებდი კაც დეპუტატებს „ოცნებიდან“, ქალებს ესროდნენ წიგნებს”, – თქვა აქუბარდიამ.

მედიის წარმომადგენლებს სხდომის დაწყებამდე, მაშინ, როცა ფიზიკური დაპირისპირება იყო, დარბაზში არ უშვებდნენ.

---

„ქართული ოცნება“ კიდე ერთხელ აპირებს რუსული კანონის მიღებას, რომელიც 2023 წლის მარტში მასობრივი პროტესტის შედეგად უკან გაიწვიეს. „ქართულმა ოცნებამ“ გასულ წელს დადო პირობა, რომ რუსულ კანონს აღარ დაუბრუნდებოდნენ, მაგრამ პირობა დაარღვია. ქართულმა ოცნებამ კანონპროექტის პირვანდელი ფორმულირებიდან მხოლოდ სიტყვა "აგენტი" ამოიღო და ის უცხოური ძალის ინტერესების გამტარებლით შეცვალა.
კანონის მიხედვით, ყველა არასამთავრობო და მედიაორგანიზაცია, რომლის შემოსავლების 20%-ზე მეტი უცხოეთიდან არის მიღებული უცხოური ძალია ინტერესების გამტარებლად ჩაითვლება. სახელმწიფო არ გამოიკვლევს თუ რას საქმიანობენ და რა მიზნებს ემსახურებიან ეს ორგანიზაციები და მათ ყველას უცხოური ძალის ინტერესის გამტარებლად შერაცხავს.
კანონი მიმართულია ევროპასა და ამერიკისაგან შემოსულ დაფინანსებებზე და არა მტრულად განწყობილი ქვეყნებიდან შემოსულ დაფინანსებებზე, როგორც ეს ცივილიზებულ ქვეყნებშია.
კანონის ინიცირების გამო შეშფოთება გამოთქვეს ევროკავშირის წევრმა და საქართველოს მეგობარი ქვეყნების ლიდერებმა, რუსეთის პრეზიდენტის პრესმდივანმა კი „ქართული ოცნების“ კანონი მოიწონა.