7 dekabr tarixində Mirzə Fətəli Axundovun Tbilisidə fəaliyyət
göstərən ev muzeyində “Türkün Şanlı Zəfəri” adlı tədbir keçirilib.
Tədbir “Gənclərin Töhfəsi İctimai Birliyi”, “Azərbaycan-Türkiyə
Qida Təhlükəsizliyi İctimai Birliyi” və “BEEZ” Uşaq Teatrının
tərəfdaşlığı ilə “Şuşa ili” çərçivəsində baş tutub. Bu barədə
“BEEZ” Uşaq Teatrının bədii rəhbəri Binəli İslamoğlu “Marneuli”
radiosuna məlumat verdi. Onun sözlərinə görə, tədbir çərçivəsində
festival da baş tutub. Gürcüstandan festivala qoşulan gənclər
özlərinin çəkdikləri rəsm əsərləri nümayiş etdiriblər.
Binəli İslamoğlu onu da bildirdi ki, “Türkün Şanlı Zəfəri” adlı
müsabiqə də keçirilib. Qaliblərin adları yaxın vaxtlarda
ictimaiyyətə açıqlanacaq. Onun sözlərinə görə, qaliblərin
mükafatlandırılması mərasimi Azərbaycanın Şuşa şəhərində
keçiriləcək. Şuşaya isə birinci, ikinci və üçüncü yerə çıxan
qaliblər gedəcəklər.
Tbilisidə keçirilən tədbiri layihənin rəhbəri Məhsəti Hüseynova
açaraq qonaqları salamlayıb və qonaqlara layihə haqqında məlumatlar
verib. Daha sonra tədbir iştirakçılarına söz verilib. Onlar da öz
çıxışlarında bu cür tədbirin keçirilməsinin önəmindən danışıblar.
Qeyd ediblər ki, bu cür tədbirlər tez-tez keçirilməlidir.
Daha Sonra “BEEZ” Uşaq Teatrının kollektivi şeirlər
səsləndiriblər.
“Türkün Şanlı Zəfəri” adlı tədbirdə Azərbaycanın Gürcüstandakı
səfirliyinin əməkdaşı Ramel Lətifov, Qardabani bələdiyyəsinin icra
başçısının müavini Fuad Mirzəyev və digər rəsmi şəxslər, gənclər və
maraqlanan şəxslər iştirak ediblər.