Qızılhacılı kəndində sakinlərin evinə və həyətinə “Qara arx”dan su dolur (VİDEO)
16:52 / 06.12.2023
Marneulinin Qızılhacılı kəndində yaşayan 66 yaşlı Heydər
Qiyasoğlunun evinə və həyətinə “Qara arx”dan su dolur. Onun
sözlərinə görə, iki ilə yaxındır ki, bu cür problemlə
qarşılaşıblar.
“İki ildir ki, həyətə su axır. İcra nümayəndəsinin
yanına getmişəm, deputatın yanına getmişəm, ondan sonra Zaurun
yanına getmişəm, meriyaya getmişəm, su idarəsinə də getmişəm. Mənim
işimə baxmırlar. Bu su mənim damıma zərər verib. Budur qarajıma da
ziyan verib. Məcburi özüm qaraja beton tökdürdüm. Dedim, evimə
ziyan vurmasın. Evimə də ziyanı dəyir. Dedim ki, su betonun üstündə
qalsın və əlimizlə çəkək. Hər səhər belə gələndə əlimizə çalğıyı,
süpürgəni, vedrəni götürüb suyu çıxarıb tökürük. Evin altından da
çıxdı. Oranı da eşdirdim ki, heç olmasa betonun üstündə qalsın,
təmizləyək. Evimiz çökməsin. Zavod qabağını bağlayıb, arxı
dirəndirib. O, pul qazanır, mən də batıb
gedirəm”.
Heydərin sözlərinə görə, qonşular da bu problemdən narahatdırlar.
Heydərin həyətindən axan su qonşuların evinə də ziyan vurur.
Qonşular da ondan bu məsələni həll etməsini tələb edirlər.
“Bu evə ziyan verir, o, da qalxıb mənimlə dalaşır.
Deyirlər, niyə arxası ilə düşmürsən. Nə edim, arxası ilə düşürəm.
Haranı tanıyıram, gedirəm. Meriyaya getdim, yanındakı işləyənlərə
göstərdi ki, bunun işinə baxın. Özü çıxıb getdi. Zaur Darğallının
yanına getdim, oğlan çıxdı, dedi ki, burada yoxdur. Baxmadı. İcra
nümayəndəsinin yanına getdim, gəldi, baxdı, dedi ki, burada böyük
iş xarab olur. Getdi dedi, suyu kəsmədilər. Dedilər, suyu kəsmək
olmaz. Yerlər suvarılır. Kəsmək olmaz. Payız gəldi, bəs niyə
kəsmədilər?! Bir əziyyətlə özüm suyu saxlatdırdım. Özüm gətirdim,
1000 lari xərc çəkdim, beton tökdürdüm. Üç gün möhlət vermədilər
ki, o quruyardı. Üçüncü gün suyu buraxdılar. Hər şey oldu, yenə də
su gəldi. İndi hələ şaxta yoxdur. Bir şaxta olsun. Şaxta olanda
dizi üstə sürünə-sürünə adlayırıq. Yarı yaşa gəlmişəm, 66 yaşım
var. Yıxılıb eləyərəm. Mən burdan keçə bilərəmmi?! Hətta suyun
həyəti basması nəticəsində gəlinim də yıxılıb, xəsarət
alıb”.
Heydər Qiyasoğlu və qonşular dəfələrlə aidiyyəti orqanlara müraciət
ediblər. Onların dediyinə görə, problemlə maraqlanan olmayıb.
Gürcüstan Meliorasiyası Kvemo Kartli Regionunun Xram-Debet
Xidmətinin rəhbəri Tornike Qoqlidze bizimlə söhbəti zamanı bildirdi
ki, məsələni araşdırmaq üçün artıq Qızılhacılıya gediblər.
“Ümumiyyətlə, nazirin 2003-cü il sərəncamı var və həmin
sərəncam əsasında da kanalın hər iki tərəfində, sağ və sol
tərəfindən böyüklüyündən irəli gələrək, həmin kanalın başqasına
verilməsi ölçüləri 6 metr təşkil edir. Yəni buna istismar yolu
deyilir. Belə problem olan zaman, misal üçün, əhalinin evinə su
dolur, biz texnikamızla gedib işləyib problemi həll edirik. Bu
konkret hadisədə yaşayış evinin hasarları, orada ayrı ot tayları
yığılıb və yol belə bağlıdır. Qanunu pozublar və fiziki olaraq
girmək mümkün deyil. Biz həmin sakinlə danışdıq, razılığa gəldik
ki, əgər qonşudan, qanunla bizə düşən yolu versələr və həmin yolu
boşaltsalar, biz xüsusi texnikanı apara bilərik, bu problem həll
olunar. Buna razıdırlar. Zəng vuranda texnikanı aparacağıq və
işləyəcəyik”.
Məsələyə aydınlıq gətirmək üçün Heydər Qiyasoğlu ilə təkrar əlaqə
saxladıq. O, “Marneuli” radiosuna təsdiqlədi ki, aidiyyəti
orqanlardan onun məsələsi ilə maraqlanıblar. Heydər onu da bildirdi
ki, arxın kənarına yığılan ot tayaları ona məxsus deyil. Həmin ot
tayaları qonşuya məxsusdur.