Marneulidə keçirilən seçkilər Marneulinin keçmiş meri üçün maraqlı deyil
Bu gün, 19 may
tarixində növbədənkənar mer seçkiləri günü Marneulinin keçmiş meri
Marneulidə olmayıb və heç seçkilərin gedişi ilə də maraqlanmayıb.
Keçmiş mer “Marneuli” radiosu ilə söhbəti zamanı bildirib ki, şəxsi
işləri ilə məşğuldur.
Temur Abazov hal-hazırda “Gürcü Arzusu”nun üzvü olub-olmaması ilə
bağlı sualı cavabsız qoyub. Keçmiş mer “Gürcü Arzusu”nun mer
vəzifəsinə namizədinə açıq şəkildə dəstək bildirməyib.
“Kim güclüdürsə, onun qalib gəlməsini arzulayıram”, – o, “Gürcü
Arzusu”nun namizədi Zaur Darğallını necə dəyərləndirməsi ilə bağlı
sualına belə cavab verib.
2017-ci ildə keçirilən yerli özünüidarə seçkilərində qalib gəlmiş
Temur Abazov bu vəzifədə cəmi 8 ay qala bilmişdi. 2018-ci ilin 14
iyununda prokurorluq onu Marneuli sakini Elçin Allahverdiyevə qarşı
alçaldıcı və qeyri-insani rəftarda ittiham edib. Məsələ 13 iyunda
sosial şəbəkədə yayımlanan, Elçin Allahverdiyevin öz sidiyi ilə
üzünü yumağa və ailə üzvünə söyüş söyməyə məcbur edildiyi video ilə
bağlı idi.
Həmin video övladı öldürülmüş Malxaz Maçalikaşvili və Zaza
Saralidzeyə dəstək aksiyasında Elçin Allahverdiyevin Facebookda
canlı yayıma qoşulması zamanı qeydə alınmışdı. Sosial şəbəkədə o,
əhalini Milli Hərəkatı dəstəkləməyə çağırır və sonda Marneulinin
meri Temur abazovun həyat yoldaşına və Bidzina İvanişviliyə söyüş
söyür.
Marneulinin merinə qarşı cinayət işi Gürcüstanın CM-nin 144.3-cü
maddəsinin 2-ci hissəsinin a altbəndi ilə başlayıb. Maddə dövlət
məmuru və ya onun səviyyəsinə bərabər olan şəxs tərəfindən
təhqiredici və insanlıqdan kənar yanaşmanı nəzərdə tutur. 6
sentyabrda Temur Abazovun ittihamı ağırlaşdı və istintaqa 25, 157.1
maddəsinin birinci və ikinci hissələri əlavə olundu. Həmin maddələr
şəxsi həyatı təsvir edən materialın əldə olunması, təşkili,
internet və sosial şəbəkələrdə yayımlanmasını nəzərdə tutur.
Abazovun məhkəmə prosesi başa çatmayıb.
2018-ci ilin 13 dekabrında keçmiş mer 10 000 larilik girov
qarşılığında azad olunub. İttiham təsdiq olunduğu halda onu 5-dən
10 ilə qədər həbs gözləyir.
Temur Abazovun merlik səlahiyyəti rəsmi olaraq 2019-cu ilin 13
fevralında dayandrılıb. Onu müvəqqəti olaraq birinci müavin Zaur
Tabatadze əvəz edir.
19 may 2019-cu il seçkilərində keçirilən növbədənkənar seçkilərdə
qələbə qazanacaq namizəd bu vəzifədə 2021-ci ildə keçiriləcək yerli
özünüidarə seçkilərinədək qalacaq.