Marneuli uşaq bağçaları və məktəbə hazırlıq mərkəzlərinə
2022-2023-cü tədris ilində 1564 uşaq qeydiyyatdan keçib.
Neçə uşaq məktəbəqədər təhsildən kənar qalıb, Marneuli Uşaq
Bağçaları Birliyi bunu hələ hesablamayıb. Birliyin rəhbəri Zaur
Kərəmovun sözlərinə görə, bir neçə günə dəqiq məlumatları olacaq,
ancaq ilk baxışdan vəziyyət ağırdır.
“Bilmirik, neçə uşaq qalacaq, amma vəziyyət çox
ağırdır. Çünki Qızılhacılı bağçası bağlıdır. Oktyabrda 1 saylı
bağçada iş başlayacaq. Yəqin sonra vəziyyət yüngülləşəcək. Mənim
əməkdaşlarım işləyirlər, uşaqların valideynlərinə zəng vururlar və
uşağın bağçaya qəbul olması, yaxud ehtiyatda qalması barədə məlumat
verirlər. Bir neçə günə dəqiq məlumatım olacaq. Yalnız şəhər
bağçalarında vəziyyət çətindir. Digər bağçalarda yaxşıdır,
stabildir. Tələb olan yerdə ərizələri qəbul edirik və məktəbəqədər
hazırlıq qrupları açırıq. İndi planda 5 qrupun açılması var. Bu
müxtəlif kənd məktəblərində olacaq. Bunu üzərində işlər aparılır.
Bunların hamısı maddi vəziyyətdən asılıdır”, – Zaur
Kərəmov bildirdi.
Marneuli bələdiyyəsi miqyasında 84-dən artıq kənd var. Məktəbəqədər
təhsil müəssisələrinin sayı isə 14-dür. Baxmayaraq ki, məktəbəqədər
təhsildən kənar qalmış uşaqların sayı hər il artır, mövcud
vəziyyətə iki bağçanın fəaliyyətsizliyi də əlavə olunub. Təmir
işlərinə görə Marneuli şəhər 1 saylı və Qızılhacılı bağçaları
uşaqları 15 sentyabrda qəbul edə bilməyəcək.