Niyə uşaq “arvad” ola bilməz – uşaqlıqdan məhrum edilmə, mental və
fiziki sağlamlıq problemləri, maddi asılılıq və ölüm təhlükəsi.
Bu erkən yaşda nikahın və uşaqların zorla evləndirilməsinin yarada
biləcəyi nəticələrin kiçik siyahısıdır.
“Bu gün, zorla evləndirmə halları xüsusilə,
azərbaycanlı icmada yayılıb. Bu ona görə, baş verir ki, dövlət bu
hadisələrə göz yumur. İnsanlar cəzalandırılmır. Cəzalandırılsa bu
cinayət də adi şəkildə olmayacaq”, – Qadın
hüquqlarının müdafiəçisi Baia Pataraia “Marneuli” radiosu ilə
söhbəti zamanı bildirib.
Pataraia erkən yaşda nikah, Gürcüstan qanunvericiliyindəki
çatışmazlıqlar, erkən nikah və 16 yaşa çatmamış şəxslərlə cinsi
əlaqə qurma zamanı dövlət təcrübəsi necədir, nələr dəyişməlidir
kimi mövzulardan söhbət açıb.
Kim uşaq hesab olunur və erkən
yaşda nikah nədir?
Gürcüstan qanunvericiliyi ilə nikah yaşı olaraq 18 yaş müəyyən
edilib. Əgər 18 yaşa çatmamış şəxsə toy olubsa o, artıq erkən nikah
sayılır və qanunla cəzalandırılır.
“Digər mühüm qanunvericilik 16 yaşa çatmamış şəxslə
cinsi əlaqənin qadağan edilməsidir. Bunu pedofiliya da adlandıra
bilərik. Həddi-büluğa çatmış şəxs 16 yaşa çatmamış şəxslə cinsi
əlaqə qurarsa o, cinayət törətmiş şəxsdir. Ona görə də erkən
nikahdan danışan zaman və bəzən uşaq evliliyi terminindən istifadə
edirik, burada mühüm olan yaşdır. Əgər şəxs 16 yaşa çatmayıbsa və
evlənirsə, aydın məsələdir ki, evlilik cinsi əlaqəni nəzərdə tutur,
burada artıq cinayət işinin yeri var. Ancaq 16-dan 18 yaşa qədər
şəxs nikaha girirsə, dövlət bunu evlilik olaraq qəbul etmir. Çünki
dövlət evlilik kimi ciddi qərarın yetkinlik yaşına çatmış şəxslər
tərəfindən qəbul olunmasını deyir”, – Baia Pataraia
bildirir.
Gürcüstan qanunvericiliyi ilə
qızların zorla (sövdələşmə) ərə verilməsi və qızların qaçırılması
cəzalandırılır.
Pataraianın sözlərinə görə, Gürcüstanda qızların erkən yaşda zorla
evləndirilməsi də tez-tez baş verir.
“Eləcə də Gürcüstanda zorla evlilik və yetkinlik yaşına
çatmamış şəxslərin zorla evləndirilməsi qadağan olunur. Hələ ki,
dövlət nikah yaşını müəyyən edirsə, 18 yaşdan aşağı xüsusuilə
qızlarla bağlı problemlərimiz var. Əksər hallarda bu məcburi
nikahdır, yəni sövdələşmə ilə nikah, ailələr qərar qəbul edirlər.
Bu zaman azyaşlı qərar qəbul edə bilməz, nə də etmir, amma onun
ailəsi qərar verir və əksər hallarda bu məcburi qəbul olunan
qərardır. Çox sayda real faktlar var ki, azyaşlının başqa maraqları
var, o, evlənmək istəmir. Misal üçün, təhsilini davam etdirmək
istəyir ya başqa planları var. Amma ailə belə qərar verir. Aydındır
ki, bu məcburi evlilikdir. Bu hüquqi evlilik də deyil, Gürcüstanda
belə problemlər var və realdır”
Baia Pataraianın sözlərinə görə, Gürcüstanda daha bir hüquqi
tənzimləmə var və bu qız qaçırma ilə əlaqədardır.
“Gürcüstan qanunvericiliyində nikah məqsədi ilə qız qaçırma kimi
maddə yoxdur. Hər hansı qaçırma azadlıqdan qanunsuz məhrum etmə
hesab olunur və kifayət qədər ağır cəzalandırılır, heç bir
yüngülləşdirmənin təsiri yoxdur, heç kim evlilik məqsədi ilə kimisə
qaçırmasına görə özünə haqq qazandırmasın. Bu çox ağır cinayətdir
və bu cinayətə qarşı tolerantlıq sıfır olmalıdır”, –
Baia Pataraia bildirir.
Erkən nikah uşaqlara hansı
problemləri yaradır?
Qadın hüquqlarının müdafiəçisi Baia Pataraia erkən yaşda nikah
qurbanı olan uşaqların qarşılaşdığı problemlərdən söhbət açıb.
Onlar təhsil ala bilmirlər, karyerada inkişaf etməkdə, işləməkdə
maneçilik yaranır, ağır sosial, sağlamlıq problemləri baş
verir.
“Əksər hallarda erkən yaşda nikah qurbanının iqtisadi
baxımdan tamamilə, həyat yoldaşı adlandırdıqları zorakı şəxsdən
asılı olmasına görə, müxtəlif növ zorakılıq halları tez-tez baş
verir. Əksər hallarda özünü xilas etmək imkanı olmayan,
zorakılıqdan qurtula bilməyən şəxslər zorakılıq qurbanı olurlar.
Eləcə də sağlamlıq baxımından, xüsusilə də hamiləlik baş verərsə
problem yaranır. Yetkinlik yaşına çatmamış dövrdə qızlar
hamiləlikdə çox çətinlik çəkirlər və doğuş, reproduktiv sağlamlıqda
bir sıra problemlərə səbəb olur. Əlbəttə, bunların hamısının
psixoloji sağlamlıq hissəsi də var. Məcburi nikah halında bizdə
həmişə zorlama – razılıq olmadan cinsi əlaqə olur. Ancaq bizim
ədalət sistemi bunu demək olar heç vaxt görmür”, –
Baia Pataraia bildirir.
Dövlət təcrübəsi və nəzərə
çarpmayan cinayətlər.
Hüquq müdafiəçisinin sözlərinə görə, ədalət sistemində qadın və
qızlara qarşı diskriminasiya var. Bu gender həssaslığının
azlığından yaranıb, eləcə də dövlət cinsi cinayətləri görmür. O,
bildirir ki, dövlət siyasəti, qanunvericilik cinsi cinayətlərlə
bağlı problemlidir və dəyişdirilməlidir.
“Qanunvericiliyimizdə də səhvlər var. Cinsi
cinayətlərdən danışanda misal üçün, 16 yaşa qədər şəxsin könüllü
şəkildə cinsi münasibətinin olduğu təsdiqlənərsə, artıq yüngül
cinayətdir və əksər hallarda prosessual razılaşma baş tutur. Uşaq
evliliklərində həmişə belə maddələrə rast gəlirik. Beynəlxalq
standarta görə, 16 yaşa qədər şəxslə hər hansı cinsi əlaqə
avtomatik olaraq zorlama hesab olunmalıdır. Çünki bu halda uşaq
yetkinlik yaşına çatmış şəxslə əlaqəyə razılığını ifadə etmək üçün
çox kiçikdir. Yəni avtomatik olaraq zorlama hesab olunmalıdır. Amma
bizim qanunvericiliyə görə, hesab olunmur və bunun üçün çox yüngül
maddə düşünülüb. Bu bizim qanunvericiliyin çatışmazlığıdır və bütün
beynəlxalq təşkilatlar bunu deyir ki, bu maddə dəyişdirilməlidir.
Ümumiyyətlə, cinsi cinayətlərdən danışırıqsa, bır sıra islahatar
aparılmalıdır”.
14 yaşlı Aytacın işi – erkən
yaşda nikah təcrübəsinin dəyişdirilmək imkanı
6 oktyabrda Saqareco bələdiyyəsinin Ləmbəli kəndində 14 yaşlı Aytac
Şahmarovanı 27 yaşlı Asim Aslanov öldürüb. Asim Aslanov azyazşlı
Aytacı evlənmək məqsədi ilə qaçırıb. Azyaşlı bu il 9-cu sinifdə
getməli idi. O, Dmanisidən, Uzunkənddən idi, məktəbə isə Yuxarı
Qarabulağa gedirdi.
Polis Aytacın ölümünə görə, onun “əri”-ni 10 oktyabrda, dörd günlük
axtarışdan sonra saxlayıb. Asim Aslanova həbs cəzası verilib və
azyaşlı ailə üzvünü qəsdən, gender əlaməti ilə öldürdüyünə,
qanunsuz odlu silah daşıdığına görə, ittiham olunur.
Qətldən əlavə məhkəmə Aytacın anası və dayısına da həbs cəzası
verib. Onlar nikaha məcbur etmək və cinayət haqqında məlumat
verməməkdə ittiham olunublar.
Qadın hüquqları müdafiəçisi Baia Pataraianın sözlərinə görə,
Aytacın ölümü göstərdi ki, ictimaiyyət hakimiyyətə daha ciddi
tələblər qoya bilər. Bu şəkildə erkən nikahla daha effektiv
mübarizə aparacaqlar.
“Mən xatırladım ki, ümumilikdə 20-25 il əvvəl etnik
gürcülərdə evlənmək məqsədi ilə qız qaçırtmaq halları tez-tez baş
verirdi. Ancaq bu təcrübə adi şəkildə aradan qaldırıldı. Çünki
ciddi cəzalandırma başladı və polislər bu cinayətə göz yummadılar.
Bu gün məcburi nikahların xüsusilə azərbaycanlı icmada yayılmasının
səbəbi dövlətin buna göz yummasıdır. İnsanlar cəzalandırılmasa,
belə edilsə, cinayət adətən aradan qalxar, çünki tariximiz göstərir
ki, qanun tətbiq olunarsa, cəmiyyət asanlıqla öz davranışını
dəyişəcək və bu tip cinayətlərdən imtina edəcək. Bu bir hadisə
dövlətin indiyə qədər daha sərt mövqe tutduğu məsələ olaraq
görünür, amma mən şəxsən məktəb rəhbərliyinin və bu cinayətin baş
verdiyini bilən, lakin heç kimə xəbər verməyən və qarşısını almayan
dövlət məmurlarının məsuliyyətini görməyənə qədər, dövlətin bu işi
vicdanla araşdırdığını deyə bilmərəm. Bizdə bu problem ona görə
yaranır ki, polis və prokurorluq çağırışa səviyyəsində durmur,
azərbaycanlı qızlara qarşı törədilən cinayətlərə göz yumur və bu
sistemli ayrı-seçkilikdir, dövlət səviyyəsində
ayrı-seçkilikdir”.
Pataraianın sözlərinə görə, hüquq mühafizə qurumlarının qızlara
qarşı istiqamətlənmiş cinayətə göz yummaması mühümdür və effektiv
olaraq reaksiya göstərməyə başlamalıdırlar.
“Bu gün azərbaycanlı icmasında cəzalandırılmamaq
sindromu ona görə var ki, real olaraq heç kimi cəzalandırmırlar və
əhali illüziyaya düşür ki, bu yolveriləndir, ona görə də
edirlər”, – Baia Pataraia bildirir.
Gürcüstan Daxili İşlər Naziriyinin məlumatına görə, 2020-ci ildə
azyaşlı ilə güman edilən nikah motivi ilə törədilmiş təxminən 134
cinayətdən, 2021-ci ildə təxminən 212, 2022-ci ilin 6 ayında ( 1
yanvardan 30 iyuna qədər) – təxminən 61 cinayət işi ilə bağlı
istintaqa başlanılıb.
Əsas şəkil: Samirə Bayramovaya