Marneuli bələdiyyəsinin uşaq bağçalarında yeni il hədiyyələri
paylanacaq. Uşaq Bağçaları Birliyi hər uşaq üçün 5 lari dəyərində
pul ayırıb.
Uşaq Bağçaları Birliyinin rəhbəri Zaur Kərəmov “Marneuli” radiosu
ilə söhbəti zamanı bildirdi ki, hədiyyə səbətində əsasən dəftərxana
ləvazimatları olacaq.
“Təxmini deyə bilərəm ki, maska, 12 rəngdə qələm,
xətkeş, pozan, rəsm dəftəri olacaq. Ola bilsin yeni il qolbağı da
qoyulsun. İndi kiçik formatda kitab axtarırıq, əgər tapa bilsək.
Əsasən, inkişaf üçün nəzərdə tutulmuş ləvazimatlar olacaq. Hər uşaq
üçün 5 lariyə yaxın pul nəzərdə tutulub”, – Kərəmov
bildirib.
Birliyin rəhbərinin sözlərinə görə, hədiyyələri almaq üçün tender
elan edilməyəcək və onu birbaşa qaydada alacaqlar. Uşaq
bağçalarında hədiyyələr ayın axrına yaxın paylanılacaq.
Marneuli bağçalarında yeni il tətili 29 dekabr tarixindən
başlayacaq və 15 yanvar tarixinə qədər davam edəcək.