“Ətraflı məlumat üçün Dövlət Satınalma Agentliyinin
rəsmi veb-səhifəsinə nəzər yetirin”.
Ramal Əhmədovun Marneuli meriyasından tələb etdiyi ictimai məlumata
məhz belə cavab verilib.
Ramal Marneuli meriyasına rəsmi ərizə ilə 10 iyul tarixində
müraciət edib. Məəktubda vətəndaş Marneuli şəhəri, Şərifov
küçəsində yerləşən futbol meydançası ilə bağlı məlumat tələb
edirdi. Konkret olaraq o, stadionun kim tərəfindən təmir olunduğu
və nə qədər vəsait xərcləndiyi barədə məlumat almaq istəyirdi.
16 iyul tarixində meriyadan Ramalın ərizəsinə cavab verilib. Cavab
məktubunda qeyd olunub ki, vətəndaş Bakı və Şərifov küçələri
arasında yerləşən stadionun hasarlanması işləri ilə bağlı ətraflı
məlumatı Dövlət Satınalma Agentliyinin rəsmi veb-səhifəsindən ala
bilər.
Ramal Əhmədov “Marneuli” radiosu ilə söhbəti zamanı qeyd etdi ki,
meriya onun sualına cavab vermək əvəzinə yalnız Dövlət Satınalma
Agentliyinin rəsmi veb-səhifəsinə daxil olmağı məsləhət görərkən ən
azından məlumat ala biləcəyi veb-səhifənin ünvanı məktubda qeyd
edilə bilərdi.
Marneuli meriyasının İnzibati Xidmətinin rəhbəri Nino Dekanoidze
bizimlə söhbəti zamanı bildirdi ki, qeyd olunan stadionla bağlı
bütün növ sənədlər Dövlət Satınalma Agentliyinin rəsmi
veb-səhifəsinə yüklənib və onlar da vətəndaşa cavab vermək üçün
həmin ünvandan almalı idilər. Meriyanın müvafiq xidməti isə məhz
buna görə bu formada cavab yazıb.
Gürcüstan Ümumi İnzibati Məcəlləsinin 40-cı maddəsinin 3-cü
hissəsinə əsasən ictimai məlumatın öncədən yayımlanmış olması
ictimai müəssisəni həmin və ya başqa ictimai məlumatın tələb
olunması halında müəyyən olunmuş qaydada cavab vermək
məsuliyyətindən azad etmir.