Gürcüstan xalq müdafiəçisi Marneuli mədəniyyət
evinin fəaliyyətində dini ayrı-seçkilik əlamətlərinə rast
gəlməyib.
Marneulili fəal Samirə Bayramova 2019-cu ilin fevral ayında xalq
müdafiəçisi aparatına mədəniyyət evi tərəfindən dini ayrı-seçkiliyə
yol verilməsi ilə bağlı ərizə ilə müraciət edib.
“Samirə Bayramova ərizəsində mədəniyyət evi tərəfindən
dini ayrı-seçkiliyə yol verildiyini bildirirdi, o, həmçinin qeyd
edirdi ki, mədəniyyət evi müsəlman icmasının heç bir dini
bayramının təşkilatçılığını həyata keçirmir”, – xalq
müdafiəçisinin mədəniyyət evinə göndərdiyi qərarda deyilir.
Bayramovanın ərizəsində qeyd edilmişdi ki, mədəniyyət evinin
əməkdaşları və rəhbəri tərəfindən “Facebook”da nifrət dili və irqi
ayrı-seçkilik məzmunlu şərhlərə yol verilir.
Xalq müdafiəçisi bu məsələ ilə bağlı araşdırmalara başlayıb və
müəyyən edib ki, tərəflərin təqdim etdiyi dəlillərdən ayrı-seçkilik
faktına yol verilmədiyi aydın olub.
“Həmçinin, xalq müdafiəçisi hesab edir ki, mədəniyyət
evinin əməkdaşları tərəfindən yazılmış şərhlər diskriminasiyaya
təşviq kimi də dəyərləndirilə bilməz. Çünki həmin şərhlər ümumi
xarakter daşıyır və konkret şəxsə və/və ya şəxslərdən ibarət qrupa
qarşı zorakılığa çağırış məzmunlu deyil” – Xalq
müdafiəçisi tərəfindən mədəniyyət evinə göndərilmiş qərarda
yazılıb.
Marneuli mədəniyyət evi xalq müdafiəçisinin qərarını bu gün, 11
sentyabr tarixində “Facebook” səhifəsində yayımlayıb.
Samirə Bayramova “Marneuli” radiosu ilə söhbəti zamanı qeyd etdi
ki, o, xalq müdafiəçisinin qərarı ilə bağlı mədəniyyət evinin
“Facebook”dakı paylaşımından sonra xəbər tutub və hələ ki xalq
müdafiəçisi ona hər hansı rəsmi qərar göndərməyib.