Beynəlxalq xəbər agentliyi Reuters yazıb ki, Ukrayna Aİ-yə üzvlüklə bağlı Avropa Komissiyasından müsbət tövsiyə alıb. Məlumatı Reuters agentliyinə mənbələr verib.

Avropa İttifaqına qoşulmağa müsbət cavab korrupsiyaya qarşı mübarizə və azlıqların hüquqları ilə bağlı müəyyən şərtlərlə müşayiət oluna bilər. Bu məsələni Macarıstan qaldırıb.

Noyabrın 8-də Avropa Komissiyasının illik hesabatı dərc olunacaq, yekun qərar isə dekabrın 14-15-də keçiriləcək sammitdə açıqlanacaq.

Moldovanın da analoji müsbət qiymət alacağı gözlənilir.

Ölkənin Avropa İttifaqına daxil olması ilə bağlı qərarı Avropa Komissiyasının tövsiyəsindən sonra Avropa Şurası qəbul edir.

Gürcüstana gəlincə, Avropa Komissiyası bu ölkəyə Avropa İttifaqına namizəd statusunun verilməsi ilə bağlı hələ qərar verməyib.

23 iyun 2022-ci ildə Avropa Şurası Ukrayna və Moldovaya namizəd statusu vermişdi və onun Gürcüstanla bağlı “Avropa perspektivini” tanımışdı. Avropa Komissiyası Gürcüstana namizəd statusu almaq üçün 12 bəndlik tapşırıq verib.

Sentyabrın 15-də Gürcüstanda fəaliyyət göstərən ictimai təşkilatların qiymətləndirməsinə görə: Avropa Komissiyasının 12 tövsiyəsindən bir şərt tam yerinə yetirilib, iki şərt əsasən yerinə yetirilib; Yeddi şərt qismən yerinə yetirilib və Aİ-nin iki şərti (deoliqarxizasiya və depolarizasiya) hələ də yerinə yetirilməlidir.