6 yaşlı Kürtlər kənd sakini Canan Şərəyeva badamcıq əməliyyatından
sonra yaranan ağırlaşmalara görə, bu gün, 3 aprel tarixində
Marneulidən Tbilsi şəhərində yerləşən İaşvili klinikasına
köçürülüb.
O, 14 mart tarixində “Aversi” klinikasında badamcıqdan əməliyyat
olunub. Həkimlər onu əməliyyatdan bir neçə gün sonra evə
buraxıblar. Daha sonra 25 mart tarixində qanaxma baş verib və ailə
uşağı həkimə aparıb. Ancaq həkimlər heç bir problemin olmadığını
qeyd ediblər və geri göndəriblər. Bu barədə məlumatı “Marneuli”
radiosuna Cananın bibisi Lalə Binnətova verdi.
“Öz günahlarıdır, əməliyyat edən zaman damarın hansısa
birinə zərər veriblər. İndi də tapa bilmirlər. Dünən axşam yenə
oldu qanaxması, yenə gəldik buraya. Uşaq 1 ayda 4 dəfə əməliyyat
olunub. Dünən axşam uşaq özünə gələndə həkimlərə dedik, uşağı
şəhərə aparaq. Həkimlər bizə dedilər, aparın uşağı istər ölsün,
istər qalsın, bizlik deyil. Uşağın atasına pis vəziyyətdə müqavilə
imzaladıblar. Heç bilməyib, nə üçün, necə çəkib. Ondan sonra səhərə
qədər bizə uşağı vermədilər”, – Lalə Binnətova
bildirdi.
O, qeyd edir ki, həkim uşağın qanında nə isə olduğundan
şübhələnib.
“Necə həkim, necə xəstəxanadır ki, diaqnoz qoya bilmir.
Səhər yenə qan veriblər. Qan verilən zaman yenə qanaxma oldu.
Yenidən əməliyyat etdilər”.
Mövzu ilə bağlı uşağın yaxını Nihad Binnətov bildirir ki,
səhlənkarlıq klinikanın özündədir.
“Belə bir həkimə gündə neçə insan müraciət edir. Bu
insan həyatıdır, bunu hökumət, hər kəs bilməlidir. Bilməlidir ki,
insan həyatı bu qədər ucuz olmamalıdır. 3-4 gündür, hələ yeni
analiz götürüblər. Bu düzgün deyil. Adicə bir diş çəkiləndə belə
bunun analizini etməlidirlər. Bu böyüklükdə Marneuli şəhəri
xəstəxana və həkim çatışmazlığı əlindən Tbilisiyə gedir. Ən təcili
xəstələrə burada müayinə yoxdur. Bəlkə var, amma yetərincə həkim
yoxdur. Bu həm hökumətin, həm xəstəxananın problemidir. Buna görə
də, həkimlər istədiyini edirlər. 20 gündür, əməliyyat olunub,
yenidən qanaxma olub. Bu düzgün şey deyil”.
Nihad Binnətovun sözlərinə görə, qanaxma baş verəndən sonra həkimə
aparıblar, amma həkim klinikada olmadığına görə onları geri
göndəriblər.
“Belə bir şey ola bilməz, bura xəstəxanadır. Təcili yardıma zəng
edirik, onun da vaxtı yoxdur. Bu hakimiyyət haraya baxır?!. Bu
birinci növbədə dövlətin, ikinci xəstəxananın, üçüncü növbədə isə
həkimin günahıdır”, – Nihad Binnətov dedi.
Əməliyyatı həyata keçirən “Aversi” klinikasının həkimi “Marneuli”
radiosuna danışdı.
“20 gün əvvəl badamcıq vəzi əməliyyatı etdik. Yaxşı vəziyyətdə
getdi. 20 gündən sonra qanaxma baş verib. Səbəbini bilmirik, nə isə
baş verib. Ola bilsin, dietanı pozub. Bu mümkündür, əməliyyatdan
sonra belə hallar baş verə bilər. Ancaq 20 gündən sonra baş verməsi
bir az gecdir. İaşvili klinikasına yerləşdirdik. Burada əməliyyat
olunmuşdu, qanaxmanı dayandırdıq, sonra yenə başladı. Ona görə də
təcili yardımla İaşvili klinikasına aparıldı”, –
həkim Davit Kebrişvili qeyd etdi.
Qeyd edək ki,
2018-ci ildə Kürtlər kəndində yaşayan 12 yaşlı yeniyetmə
oxşar hadisə səbəbindən dünyasını dəyişmişdi. O, Marneulidə fəaliyyət göstərən “Marneuli Tibbi
Mərkəz” kimi adlandırılan “Adika” MMC-də əməliyyat
olunmuşdur.
Bizi Teleqramda izləyin! Yeni xəbərlər anında kanalda!
Linkə daxil olub
abunə olun!
Bizi WhatsAppda izləyin! Yeni xəbərlər anında kanalda!
Linkə daxil olub
abunə olun!
Digər maraqlı xəbərlər
"Marneuli" radiosunun
Facebook səhifəsində.
Bizi
"Telegram"da
izləyin.
Şahidi olduğunuz hadisələri çəkib bizə göndərin!
+995557994415