"Marşrutkanı hər dəqiqə saxlayırlar. Xalq harada gözləməli olduğunu bilərsə, yalnız orada gözləyər" - Marneuli sakini dayanacaqların olmaması ilə bağlı
Bələdiyyə və ya özəl nəqliyyatı gözləmək
yorucu və vaxt itkisinə səbəb olan prosesdir, lakin bu nəqliyyatda
getmək daha yorucudur və daha artıq vaxt itkisi
deməkdir.
Marşrut taksiləri sərnişin götürmək üçün
addımbaşı saxlayırlar. Məhz buna görə də 20 dəqiqəlik yolu demək
olar ki, bir saata getməli olursan.
Marşrut taksilərin tez-tez saxlamasına səbəb isə dayanacaqların
olmamasıdır. Marneulidə cəmi bir neçə dayanacaq var, lakin onların
əksəriyyəti yararsızdır və əksər hallarda sakinlər bu
dayanacaqlardan istifadə etmirlər.
“Dayanacaqların olması vacibdir, çünki marşrutkalar
yalnız dayanacaqlarda dayanmalıdır, hara gəldi yox. Addımbaşı
saxlayırlar, çünki müvafiq yerlər yaradılmayıb”, –
Marneulili gənc deyir.
“Mənim fikrimcə olmalıdır, çünki marşrutkanı hər dəqiqə
saxlayırlar. Xalq harada gözləməli olduğunu bilərsə, yalnız orada
gözləyər və hamı birlikdə minər. Fikrimcə gedəcəyimiz yerə belə
daha tez çatarıq və marşrutkalar da saatda biri
gəlməz”, – Marneulili qız deyir.
Marneulidə dayanacaqlardan biri 5 saylı məktəbin qarşısındadır.
Demək olar ki, bura xalqın ən çox istifadə etdiyi dayanacaqdır.
Müəllim və şagirdlər məktəbdən, sakinlər isə bazardan çıxdıqda məhz
bura toplaşırlar. Dayanacağın skamyası isə sınıb və sakinlər dəmir
hasarın üstündə oturaraq gözləməli olurlar.
Marneuli merinin müavini Laşa Lobcanidzenin dediyinə görə, meriya
bu məsələ ilə bağlı çalışır, lakin o, hələlik şərh verməkdən imtina
edir.
Marneulidə dayanacaq sisteminin yaradılıb-yaradılmayacağı isə hələ
ki həm “Marneuli” radiosu, həm də sakinlər üçün naməlum olaraq
qalır.