Bəzi satıcılar səməni üçün buğdanı pulsuz verirlər
Novruz bayramına
iki həftə qalıb. Artıq bütün evlərdə bayram hazırlıqlarına
başlanılıb, evlərdə təmizlik işləri aparılır, səməni
cücərdilir.
Səməni “Novruzun” əsas atributlarından biridir ki, bu da həyat və
bolluq rəmzi hesab olunur. Səməni ilk çərşənbə axşamına yaxın
vaxtda göyərdilir və Novruz bayramından sonra da evlərdə, iş
yerlərində və ictimai yerlərdə görünən yerlərə qoyulur.
Səməni əsasən toxumluq buğdadan qoyulmalıdır. Sini qablarda
göyərdilən səməni həm də yazda səpiləcək toxumun keyfiyyətini
yoxlamağa imkan verir. Əgər səməni yaxşı cücərib boy atsa, bu həmin
toxumdan bol məhsul alınacağından xəbər verir.
Bayram süfrəsi nemətləri arasında səməni mütləq olmalıdır. Səməni
yalnız evdə hazırlanmalıdır. Buna görə də insanlar bazara üz
tutaraq buğda alaraq evlərində səməni cücərdərlər.
Marneuli bazarında da bəzi buğda satan satıcılar səməni üçün alınan
toxumu pulsuz verirlər. Onlar bunu onunla izah edir ki, bu bayram
azərbaycanlıların milli bayramıdır və hər kəs evində səməni
cücərtsin deyə alıcılara hədiyə edirlər.
Xatırladaq ki, “Novruz” Bayramı əsasən Azərbaycan, Orta Asiya və
Şərq ölkələrində qeyd olunur.