Temur Abazov Marneuli meriyasından 32 000 lari tələb edir
Marneulinin
keçmiş meri Temur Abazov həbsdə olduğu müddət ərzində ala bilmədiyi
əməkhaqqını tələb edir ki, bu da 32 000 lariyə
bərabərdir.
Bələdiyyə Məclisi bu təklifi bu gün, 13 mart
tarixində keçirilmiş iclas zamanı arayış qismində qəbul edib.
Temur Abazov 7 ay müddətində ilkin həbsdə olub. O, Marneuli sakini
Elçin Allahverdiyevə qarşı qeyri-insani və alçaldıcı rəftarda
ittiham olunur. Məhkəmə Temur Abazovu 13 dekabr tarixində girov
qarşılığında azadlığa buraxmışdı. 12 fevral tarixində isə Marneuli
Bələdiyyə Məclisi Abazovun ərizəsi əsasında onun mer
səlahiyyətlərini dayandırmışdı.
Abazov ilkin həbsdə olduğu zaman səlahiyyətlərinin dayandırıldığına
görə ala bilmədiyi 7 ayın maaşının verilməsini tələb edir.
Marneuli merinin səlahiyyətlərini icra edən Zaur Tabatadzenin
sözlərinə görə, meriyanın hüquq və maliyyə xidmətlərinin
nümayəndələri bu məsələni araşdıracaqlar və əgər Abazovun tələbi
qanunvericiliyə uyğundursa, məbləğ ödənəcək.
Qeyd edək ki, Abazovun məhkəməsi hələ tamamlanmayıb.