Seçkilərdən 17 ay keçməsinə baxmayaraq Marneuli
bələdiyyəsinin saytında Bələdiyyə Məclisinin bütün deputatları
barədə məlumat hələ də yerləşdirilməyib.
Saytda Bələdiyyə Məclisinin yalnız 10 deputatı barədə məlumat
yerləşdirilib ki, bunlardan da biri Bələdiyyə Məclisinin sədridir.
Saytda onların əlaqə məlumatları, iş təcrübələri, təhsilləri ilə
bağlı məlumatlar var. 5 nəfərin isə bu məlumatlardan əlavə
fotoşəkilləri də sayta yerləşdirilib.
Bir il bundan əvvəl, 16 mart 2018-ci ildə “Marneuli” radiosu
Marneuli bələdiyyəsinin rəsmi veb səhifəsinin qaydasında olmaması
ilə bağlı material hazırlamışdı. Həmin vaxt saytda Bələdiyyə
Məclisinin üzvlərindən heç biri barədə məlumat yox idi. Buna səbəb
kimi isə saytda olan texniki çatışmazlıqları və Bələdiyyə
Məclisinin PR üzrə mütəxəssisinin olmamasını göstərmişdilər.
Marneuli BƏlədiyyə Məclisinin PR üzrə mütəxəssis vəzifəsinə işçi
qəbul edib. 28 may 2018-ci ildə Bələdiyyə Məclisi aparatının
rəhbəri Nino Beridze “Marneuli” radiosuna verdiyi müsahibəsi zamanı
bildirmişdi ki, onlar məlumat bazasını tam şəkildə hazırlayıblar və
həftənin sonunadək saytda yerləşdiriləcək. O vaxtdan artıq 10 ay
keçməsinə baxmayaraq saytda məlumat yerləşdirilməyib.
Marneuli Bələdiyyə Məclisinin PR üzrə mütəxəssisinin “Marneuli”
radiosuna bildirdiyinə görə, bu vaxtadək məlumatların yüklənməsi
texniki çatışmazlığa görə mümkün olmayıb. O, qeyd etdi ki, artıq
məlumatların yüklənməsi planlaşdırılır, lakin nə vaxt yüklənəcəyi
dəqiq müəyyənləşdirilməyib.
Marneuli meriyasının İctimaiyyətlə Əlaqələr Şöbəsinin rəhbəri
Mariam Xaçidze bizimlə söhbəti zamanı qeyd etdi ki, bu mərhələdə
sayta məlumatların yüklənməsi ilə bağlı heç bir çatışmazlıq yoxdur
və Bələdiyyə Məclisi və meriya ilə bağlı ictimai məlumatların
yerləşdirilməsi istənilən vaxt mümkündür.