Bu gün, 15 iyul tarixində Marneulidə Parlament
binası qarşısında davam edən “Ayıbdır” aksiyası çərçivəsində
məlumatlandırma kampaniyası keçirildi.
Marneulili gənclər kampaniya çərçivəsində vətəndaşlara xüsusi
bukletlər paylayırdılar və 20 iyun tarixində Gürcüstan Parlamenti
qarşısında baş vermiş hadisələrlə bağlı məlumat verirdilər.
“20 iyun gecəsi nə baş verdiyini bütün Gürcüstan bilir,
lakin dil baryeri olan milli azlıqların məlumatlandırılması daha
mürəkkəbdir. Məhz buna görə də bu gün belə fəaliyyətə başladıq və
bizim əsas məqsədimiz 20 iyun gecəsi nə baş verdiyi ilə bağlı bütün
vətəndaşların məlumatlandırılmasıdır”, – Rəşan
Ziyadəliyev deyir.
“Ayıbdır” çərçivəsində 20 iyun gecəsi yaralananlar və həbs
olunanlar barədə məlumatların yer aldığı bukletlər bu gün
Tbilisidə, Batumidə, Kutaisidə, Zuqdididə, Qoridə, Axaltsixedə və
Telavidə də paylayırlar.
20 iyun gecəsi Rustaveli prospektindəki aksiyanın iştirakçıları
Rusiya Dumasının deputatı Serqey Qavrilovun Gürcüstan Parlamenti
sədrinin küürsüsündə əyləşməsinə və nümayəndələrə rus dilində
müraciət etməsinə etiraz edirdilər. 20-21 iyun gecəsi Gürcüstan
Daxili İşlər Nazirliyi aksiyanı güc tətbiq etməklə rezin güllələr,
gözyaşardıcı qaz və su şırnağından istifadə edərək dağıtdı.
Aksiyanın dağıdılması nəticəsində 3 nəfər gözünü itirdi, 240 nəfər
müxtəlif dərəcəli xəsarətlər aldı, 38 jurnalist peşə xidmətlərini
yerinə yetirərkən yaralandı və 305 nəfər aksiya iştirakçısı həbs
olundu.