Qaçağan İctimai Mərkəzində işə qəbulla bağlı ikinci dəfə elan olunmuş vakansiyanın vaxtı başa çatıb
Marneulinin Qaçağan kəndində tikintisi başa
çatmaqda olan “İctimai Mərkəz”-də işləmək üçün yerli sakinlər hara
müraciət etmək lazım olduğunu bilmirlər.
Ədliyyə Nazirliyindən “Marneuli” radiosuna verilən məlumata görə,
artıq ikinci dəfədir ki, HR.gov.ge saytında vakansiya elan edilib
və hal-hazırda seçim mərhələsinə başlanılıb.
Sakinlərin sözlərinə görə, “İctimai Mərkəz”-in tikilməsi Qaçağan və
eləcə də digər kəndlərdən Marneuliyə gəlib müxtəlif müəssisələrdə
işləyən gənclər üçün əlverişlidir. Belə ki, onlar məsafə qət
etmədən, əlavə xərcə düşmədən İctimai Mərkəzdə işləyə
biləcəklər.
Mərkəzdə işləmək istəyən gənclər vakansiyanın elan olunmasından
xəbərləri olmadıqlarına görə öz CV-lərini lazımi ünvana göndərə
bilməyiblər.
“Mənə çox maraqlıdır, haradan məlumat almaq olar.
Vakansiyalar hansı səhifədə yerləşdirilib. Təəssüf ki, bilmirəm,
kaş xəbərimiz olardı və rahat işləyərdik”, – Qaçağan
kənd sakini deyir.
Bəziləri isə təsadüfən hansısa tanışından vakansiya ilə bağlı
məlumat eşidib və öz CV-sini göndərməyə nail olub.
“Məlumatım yox idi, mənə də rəfiqəm dedi, elə yazıb göndərdim.
Açığı bilmirəm cavab nə vaxta çıxır, bu haqda heç bir məlumatım
yoxdur”, – Nuranə Musayeva deyir.
“Marneuli” radiosunun məlumatına görə, Ədliyyə Nazirliyi yerli
özünüidarəetməyə məktub göndəribmiş və məktubda vakansiya haqqında
məlumatın yayımlanması xahiş edilirmiş. Meriyanın İnzibati
Xidmətindən radiomuza verilən məlumata görə, Ədliyyə
Nazirliyinindən məlumatın yayımlanması ilə bağlı rəsmi məktub
olmayıb. Onlar isə şifahi olaraq Qaçağan müvəkkilinə məsələ ilə
bağlı məlumat veriblər.
Bu kimi məsələlərlə bağlı əhaliyə məlumat verməyin vacib olduğunu
Marneuli meri Zaur Darğallı da təsdiq edir, ancaq deyir ki,
nazirliyin xahişi ilə bağlı o, heç nə bilmirmiş və vəd verdi ki,
məsələni aydınlaşdıracaq.