“Qeyri-hökumət təşkilatları olmasa, Maradisidə belə
güclü qadınlar olmazdı. Heç bu gözəl parkımız da
olmazdı.
Qeyri-hökumət təşkilatları tərəfindən maliyyələşdirilən
çox fermerlərimiz var. CENN qeyri-hökumət təşkilatı olmasa, bu gün
Maradisidə kitabxana, təqdimat lövhəsi, min ədəd kitabımız olmazdı.
Şagirdlərin Avstriyaya getmək imkanı da olmazdı. Gəlib həmyaşıdları
ilə bölüşdülər”,- Maradisi sakini, müəllim Anjela
Bolkvadze bildirir. O, müxtəlif təşkilatlarla əməkdaşlıq edir.
Pedaqoq hesab edir ki, Parlamentdə irəli sürülən qanun layihəsi
onların inkişafına ziyan vuracaq.
“Gürcü Arzusundan” ayrılmış “Xalqın gücü” deputatlar qrupu
Gürcüstan Parlamentində “xarici təsir agentləri” haqqında qanun
layihəsi qeydiyyatdan keçirib. Həmin qanuna görə, gəlirinin 20%-dən
artığı beynəlxalq təşkilatlardan olan bütün media və qeyri-hökumət
təşkilatları “xarici təsir agenti” hesab olunacaq.
“Agent satqın adam sayılır. Mən düşünürəm, onda Maradisidə, hamımız
QHT-in agentiyik. Şəxsən mən QHT-lər tərəfindən maliyyələşdirilmiş
Amerika xalqı tərəfindən yazılı çanta ilə məktəbə gedirəm. Mən
Amerika xalqının agentiyəm? Bu mənim üçün təsəvvüredilməzdir.
Qeyri-hökumət təşkilatları olmalıdır və onların maliyyə üçün
verdiyi pullar məqsədsiz xərclənmir”,- Anjela
Bolkvadze bildirir.
Anjela kimi Maradisi sakini Naira Bolkvadze də beynəlxalq dəstəyin
əhəmiyyətindən danışır. Ona da digər Maradisi sakinləri kimi
qeyri-hökumət təşkilatlarının maliyyə dəstəyi ilə kənd
təsərrüfatını inkişaf etdirmək, özünü kəşf edə bilmək, iqtisadi
inkişaf və təhsil imkanları verilib. Maradisdə maliyyələşdirilən 61
layihə buna sübutdur.
“Təşkilatlar olmasa, biz indi heç kim idik. Yardımlar, bu layihələr
haqqında heç bir məlumatımız olmazdı. Dövlət layihələri barədə də
bilmirdik. Bizim ilk maliyyəçimiz “Taso” Fondu idi. Bu fond gəldi
və həvəsləndirmək üçün bizə 2500 lari maliyyə verdi. Sonra
qadınların gücləndirilməsi sahəsində təlimlər keçirdi. Bundan sonra
başa düşdük ki, hansı hüquqlarımız var, layihələrdə iştirak etmək
üçün nə edə bilərik. Bizim kənd təsərrüfatı həyatımızda xarici
yardımlar, xarici təşkilatlar işıqlı nöqtə oldu. Bunlar olmasa, çox
pis olar. Gürcüstanın gələcəyini, Gürcüstan qadınlarını, kənd
təsərrüfatını da geridə qoyacaq”
Daha bir Maradisi sakini, Tamar Tğemaladzeyə də beynəlxalq dəstək
kənd təsərrüfatının inkişafı üçün imkan verib. Onun bizimlə söhbət
zamanı bildirdiyinə görə, maddi yardım olmasa müstəqil şəkildə
gəlir əldə etmək imkanı olmazdı.
“2019-cu ildən “Taso” Fondu kəndə gəldi. Onlar layihəni həyata
keçirmək üçün bizə böyük motivasiya verdilər. 2020-ci ildə mən
şəxsən layihə yazdım, layihə motoblok, kiçi əl traktoru haqqında
idi. Layihə maliyyələşdirildi və texnikanı aldım. Bu vəsait
qadınların gəlirlərini artırmaq və tək ailədən asılı olmamaları
üçündür”
“Gürcü Arzusunun” dəstəklədiyi “Xalqın gücü” hərəkatı tərəfindən
hazırlanmış yeni qanun layihəsinə əsasən, gəlirinin 20%-dən çoxu
beynəlxalq və xarici təşkilatlardan maliyyələşdirilən QHT və media
təşkilatlar “xarici təsir agenti” kimi qeydiyyatdan keçirilməlidir.
Əgər təşkilat məcburi qeydiyyatdan keçməzsə, ona 25 000 lari
dəyərində cərimə yazılacaq. Gürcüstanın Jurnalist Etikası
Xartiyasının rəhbərinin sözlərinə görə, “xarici təsir agenti”
olaraq qeydiyyatdan keçməsi media təşkilatların nüfuzdan
salınmasına səbəb olacaq. Onların cərimələnməsi isə birbaşa
regional və ya onlayn mediaların bağlanmasına səbəb olacaq. Çünki
onların cəriməni ödəmək və fəaliyyətinə davam etmək üçün kifayət
qədər maddi vəsaiti yoxdur.
Və yekun olaraq, əgər Parlament bu qanunu qəbul etsə gələcəkdə heç
bizim veb-səhifə də əlçatan olmayacaq. Çünki biz də bağlanmaq
təhlükəsi qarşısında qalacağıq.