“Avropa və Qərb dəyərlərlərindən bizi uzaqlaşdıracaq
hər hansı qanun mənim üçün qəbuledilməzdir. Sadə vətəndaş kimi
deyirəm ki, bizi Avropaya və qərb dəyərlərinə daha da
yaxınlaşdıracaq qanun qəbul etsinlər”,
– Marneul sakini Lela Xarşiladzde “Xalqın gücü” tərəfindən
Parlamentə təqdim edilmiş “xarici təsir agenti” qanun layihəsinə
belə münasibət bildirir və deyir ki, agent sözü birmənalı şəkildə
mənfi anlayışdır, xainliklər assosiasiya olunur.
“Xaricdən maliyyələşdirilən qeyri-hökumət
təşkilatlarını “agent” hesab etmirəm. Gürcüstanda yaxşı iş görən
çox sayda QHT var və onların fəaliyyətini dayandırması çox pis
olar, bizim ölkənin inkişafına da mənfi təsir göstərər. Mən şəxsən
televiziyada işləyəndə bu baxımdan çox layihəmiz var idi. Əhali ilə
NATO-nun, Avropa İttifaqının nə üçün olması, Gürcüstan niyə üzv
olmalıdır, bununla fəhlə hansı faydalar əldə edəcək – bu kimi
məsələlərdə söhbətimiz olurdu. Çox sayda QHT-lər qoşulmuşdu və
televiziyanı maliyyələşdirirdilər. Heç də “agent” olduğumu hesab
etmirəm. Agent tam başqa anlayışdır, o, xəyanətlə assosiasiya
olunur. Marneuli timsalında qeyd etsəm, CENN kənddə yaşayan adamlar
üçün çox yaxşı işlər görür. Onların fəaliyyətini alqışlayıram.
USAİD üçün də eynisini deyə bilərəm”.
"Gürcü Arzusundan" formal olaraq ayrılmış "Xalqın gücü" qrupu
Gürcüstan Parlamentində “xarici təsir agenti” haqqında qanun
layihəsini qeydiyyatdan keçirib. Qanun layihəsinə əsasən, gəlirinin
20%-dən çoxu xarici təşkilatlardan maliyyələşdirilən bütün media və
qeyri-hökumət təşkilatları “Xarici təsir agenti” hesab olunacaq.
Rusiya analoji qanunu 2012-ci ildə qəbul edib və bu faktiki olaraq
azad media və mülki sektoru məhv edib. Gürcüstanda fəaliyyət
göstərən müstəqil media və QHT nümayəndələri bildirirlər ki, yeni
qanun layihəsinin məqsədi Rusiya kimi Gürcüstanda da müstəqil
media, QHT-ni məhv etməkdir.
6 mart tarixində Gürcüstan Parlamentində artıq ikinci dəfə qanun
layihəsini müzakirə edirlər. Səhərdən yüzlərlə adam Parlament
qarşısına toplaşıb Rusiya qanununun analoqu olan qanun layihəsinə
etiraz edirlər.