Marneuli yerli özünüidarəsi kanalizasiya təmizləmək üçün maşın
alınması ilə bağlı təkrar tender elan edib.
Yerli özünüidarə 328 700 lari dəyərində olan ilk tenderi 15 mart
tarixində elan etmişdi. Tenderdə bir şirkət – “ASP-Group” iştirak
edib. Şirkət meriyaya kanalizasiya təmizləmək üçün maşını 328 700
lariyə almağı təklif edib, amma yerli özünüidarə şirkəti tenderdən
kənarlaşdırıb.
“Qiymət cədvəlində “İstehsal ölkəsi/istehsalçı/model” müvafiq
qrafada şirkət təklif etdiyi malın istehsal olunduğu ölkəni qeyd
etməyib.
Tender sənədlərinin tələblərinə uyğun olaraq alınan obyektin əmtəə
nişanı, patenti, modeli, istehsal mənbəyi və ya istehsalçısı
haqqında məlumat təqdim edilmədikdə, yaxud göstərilmədikdə texniki
sənədlər dəqiqləşdirilmir. Belə ki, namizəd şirkət tərəfindən
alınan obyektinin istehsal olunduğu ölkə dəqiq qeyd olunmadığı
halda düzəliş edilmir və tenderdə iştirak edən şirkətin
kənarlaşdırılmasına səbəb olur”, – tender
komissiyasının iclas protokolunda qeyd olunub.
Marneuli meriyası kanalizasiya təmizləmək üçün maşının alınması ilə
bağlı təkrar tenderi eyni məbləğlə 18 aprel tarixində elan edib.
Tenderdə iştirak etmək istəyən şirkətlər 28 apreldən 1 maya qədər
tender təklifini təqdim edə bilərlər.
Qeyd edək ki, yerli özünüidarə kanalizasiya təmizləmək üçün maşının
alınması ilə bağlı 180 000 lari dəyərində tenderi 2022-ci ildə də
elan etmişdi. Tenderdə yalnız bir şirkət iştirak etmişdi. Buna
baxmayaraq, Marneuli meriyası qeyd olunan tenderin dayandırıldığını
elan etmişdi, çünki tenderdə kanalizasiyanın təzyiqlə yuyulma
parametrləri müəyyən edilməmişdi.
“Qeyd olunan texniki xüsusiyyətlər və qiymət cədvəlində
kanalizasiya təmizləmək üçün maşının təzyiqli yuma parametrləri
göstərilməyib. Bu isə Marneuli bələdiyyəsinin kanalizasiya
sisteminin yuyulması məqsədi ilə lazımı komponentlərdən biridir.
Texniki xüsusiyyətlə yalnız kanalizasiya sistemində olan kütlənin
təmizlənməsini əhatə edir”, – meriyanın Əmlakın
İdarəedilməsi və Maddi-Texniki Təminat Xidmətinin əsas struktur
şöbəsinin rəhbəri Aqil Əmircanov meriyaya ünvanladığı izahatnamədə
tenderin dayandırılma səbəbini belə izah edir.