24 yanvar tarixində Marneulidə fəaliyyət göstərən “Azərbaycan
Evi”ndə Azərbaycanın Xalq şairi Zəlimxan Yaquba həsr olunmuş
“Qəbirdə yatsam belə, həmişə həyatdayam” adlı tədbir keçirilib.
Tədbir “Azərbaycan Evi”nin təşəbbüsü və təşkilatçılığı baş
tutub.
Əvvəlcə Xalq şairi Zəlimxan Yaqubun əziz xatirəsi bir dəqiqəlik
sükutla yad edilib.
Sonra “Azərbaycan Evi”nin direktoru Məhəbbət İmanov tədbiri açaraq
Zəlimxan Yaqubun həyat və yaradıcılığından söz açıb, Azərbaycan
dövlətinin Xalq şairinə daim diqqət və qayğı göstərdiyini, onun
yaradıcılığını yüksək qiymətləndirdiyini qeyd edib. Bildirib ki,
şairin yaradıcılığı Gürcüstan dövləti tərəfindən də yüksək
qiymətləndirilib.
Daha sonra Azərbaycanın Gürcüstandakı səfirliyinin məsul əməkdaşı
Ramel Lətifov çıxışında Zəlimxan Yaqubun yaradıcılğından,
Azərbaycan mədəniyyətinin inkişafındakı, dünyada tanıdılmasındakı
təbliğindəki rolundan danışıb. Bildirib ki, Azərbaycan dövləti
mədəniyyət xadimlərinə, şairlərə, söz, saz və sənət ustalarına daim
diqqət və qayğı göstərib. Z.Yaqub da bu qayğıdan kənarda qalmayıb.
Heydər Əliyevin sərəncamı ilə Şöhrət Ordeni, Prezident İlham əliyev
tərəfindən Xalq şairi fəxri adı ilə təltif olunub.
Gürcüstan Parlamentinin keçmiş deputatı, ictimai xadim Ramiz
Bəkirov, politoloq Levan Mamaladze, Gürcüstan Azərbaycanlıları
Konqresinin sədri Hüseyn Yusibov, Azərbaycan dili və ədəbiyyat
müəlliməsi Fatma Əliyeva, sabiq deputat, ictimai xadim Hidayət
Hüseynov, Azərbaycanın Əməkdar jurnalisti Nizami Məmmədzadə çıxış
edərək Z.Yaqubun həyat və yaradıcılığından söz açıb, Vətənə, xalqa,
millətə həsr olunmuş şeirlərini təhlil ediblər. Bildirilib ki, Xalq
şairinin anadan olduğu Bolnisi rayonunun Kəpənəkçi kəndində
Zəlimxan Yaqub adına mədəniyyət evi və muzey yaradılacaq. Artıq
bununla bağlı sənədləşmə işləri başa çatdırılıb və yaxın vaxtlarda
tikinti işlərinə başlanılacaq.
Aşıqlar Həvəskar Qurbanov, Nargilə Mehdiyeva, Şahbaz Göyçəoğlu və
başqaları şairin şeirlərinə bəstələmiş mahnılar ifa ediblər.
Məktəblilər şairin şeirlərindən parçalar söyləyiblər.
Tədbirdə Z.Yaqubun həyat və fəaliyyətinin ayrı-ayrı hissələrindən,
Heydər Əliyev, Prezident İlham Əliyev, Gürcüstanın sabiq prezidenti
Eduard Şevardnadze və digər rəsmi şəxslər ilə görüşlərindən bəhs
edən sənədli film nümayiş etdirilib.
Sonda Xalq şairinin qardaşı Çingizxan Yaqubov çıxış edərək tədbirin
yüksək səviyyədə təşkilinə görə “Azərbaycan Evi”nə, eləcə də şairin
ailə üzvlərinə göstərilən diqqət və qayğıya görə, Azərbaycan
dövlətinə, Gürcüstandakı səfirliyinə minnətdarlığını bildirib.
Tədbirdə Marneuli və Bolnisi rayonlarının Bələdiyyə məclis üzüvləri
Mahir Bayramov və başqaları, TİKA nın Gürcüstan nümayəndəliyi
rəhbər müavini Muhammed Emre Ezber, ziyalılar və ictimayyət
nümayəndələri iştirak edib.