4 mart tarixində Marneulidə gənclər forumu keçirilib. Tədbir “Yeni
Düşüncə İnstitutu”-nun regional layihələrindən birinin
yekunlaşdırılması ilə əlaqədar baş tutub.
Layihə çərçivəsində gənclərə öz icmalarında olan problemlər
haqqında danışmaq və advokatlaşdırma kampaniyaları keçirmək imkanı
verilib.
“Mən çox sevinirəm, çüni bizim möhtəşəm
layihələrimizdən birini başa vurduq. Layihə əlbəttə, Yeni Düşüncə
İnstitutunun digər layihələri kimi regionda yaşayan gənclərin
gələcəyinin qayğısına qalmağı nəzərdə tuturdu. Bu Niderland
səfirliyi tərəfindən maliyyələşdirilən regional layihə idi və
tərəfdaş təşkilat Qafqaz Evi idi”, – Yeni Düşüncə
İnstitutunun təsisçilərindən biri Ariz Daşdəmirov bildirir.
Gənclər forumunda Niderlandın Gürcüstandakı fövqəladə və
səlahiyyətli səfiri Meline Arakeliani də iştirak edib. O, bizimlə
söhbəti zamanı bildirdi ki, layihə mühüm məqsədlərə xidmət
göstərirdi. Onlardan biri isə gənclərdə praktiki bacarıqların
inkişafı idi.
“Mən Marneulidə keçirilən ilk gənclər forumunda iştirak
etdim. Layihə gənclər üçün vətəndaş iştirakı haqqında idi. Bu
gənclərə praktiki bacarıqlar öyrədən layihədir ki, onlar fəal
vətəndaş ola bilsinlər. Layihəni necə yazmaq, yerli hökumətlə necə
əlaqə qurmaq, cəmiyyətdə olan problemləri müəyyən etmək kimi
bacarıqlar. Ona görə də hesab edirəm ki, bunlar çox yaxşı
təşəbbüslərdir və Niderland səfirliyinin onlara dəstək ola
biləcəyinə sevinirəm”, – Meline Arakeliani
bildirir.
Yeni Düşüncə İnstitutunun Qardabanidə layihə koordinatoru Nübar
Bayramovadır. O, “Marneuli” radiosu ilə söhbəti zamanı bildirir ki,
layihəyə Qardabanidən 15 gənc qoşulubmuş və onlar müxtəlif
təşəbbüslər həyata keçiriblər.
“Bu layihəni həyata keçirmək çox zəruri idi, çünki
gənclər öz ideyalarını həyata keçirməyi, ərizə yazmağı, petisiya
yaratmağı və s. öyrəndilər. Əvvəlcə kəndlərdəki problemlər, onların
səbəbləri haqqında və təbii ki, onların həlli yollarını da
düşünürdülər”, – Nübar Bayramova bildirir.
Gənclər Forumunun yekununda layihədə iştirak edən gənclərə
sertifikat verilib. “Yeni Düşüncə İnstitutunun” məlumatına görə,
onlar bu kimi layihələrin həyata keçirilməsinə davam edəcəklər və
layihələrə daha çox adamın qoşulmasın çalışacaqlar.