Gürcüstanın Baş Naziri Azərbaycan Milli Məclisinin sədri ilə görüşüb
Oktyabrın 9-da Azərbaycanda rəsmi səfərdə olan
Gürcüstanın Baş Naziri Qiorqi Qaxariya Azərbaycan Milli Məclisinin
sədri Oqtay Əsədovla görüşüb.
"Marneuli" radiosu "Report"a istinadən xəbər verir ki, Oqtay Əsədov
Q. Qaxariyanı Baş Nazir kimi Azərbaycana ilk rəsmi səfərini yüksək
dəyərləndirib. O ümidvar olduğunu bildirib ki, səfər çərçivəsində
keçirilən görüşlər dostluq münasibətlərimizin daha da
möhkəmlənməsinə xidmət edəcək.
Qiorqi Qaxariya ölkəsinin Baş Naziri qismində ilk səfərini məhz
Azərbaycana etdiyini vurğulayıb. O qeyd edib ki, heç bir qüvvə
Gürcüstan-Azərbaycan dostluğuna, qardaşlığına kölgə sala bilməz.
Hər iki xalq tarixən bir-birinə yaxın olub, dostluq və əmin-amanlıq
şəraitində yaşayıblar. Tarixin müəyyən dönəmində oxşar problemlərlə
üzləşməyimiz regionda təhlükəsizliyin təmin edilməsinin necə vacib
olduğunu bir daha önə çıxarıb. Bölgədəki münaqişələr inkişafa böyük
maneə yaradır. Biz bu problemlərin beynəlxalq hüququn normaları
çərçivəsində ədalətli həllinə tərəfdarıq.
Vurğulanıb ki, hər iki ölkənin birgə həyata keçirdiyi layihələr
bölgə sərhədlərini aşaraq, qlobal əhəmiyyət kəsb edib. Gürcüstanın
Baş Naziri parlamentlər səviyyəsində münasibətlərin dərinləşməsinin
vacibliyinə toxunaraq beynəlxalq təşkilatlarda nümayəndə
heyətlərimizin iştirakını və bir-birilərini dəstəkləmələrini təqdir
edib.
Görüşdə Azərbaycan Milli Məclis sədrinin birinci müavini Ziyafət
Əsgərov, parlament Aparatının rəhbəri Səfa Mirzəyev, deputat Hikmət
Məmmədov, Azərbaycanın Gürcüstandakı səfiri Dursun Həsənov,
Gürcüstanın ölkəmizdəki səfiri Zurab Pataradze və digər rəsmi
şəxslər iştirak ediblər.