Kaxa Kaladze – Seçki sistemi ilə bağlı hər hansı yeni təşəbbüsü müzakirə etməyi düşünmürük
“Seçkilərə bir ildən az qalıb.
Müvafiq olaraq, seçki sistemi ilə bağlı hər hansı yeni təşəbbüsü
müzakirə etməyi düşünmürük”, – “Gürcü Arzusu”nun baş
katibi Kaxa Kaladze deyib.
Onun sözlərinə görə, seçkilər hazırda qüvvədə olan Konstitusiya ilə
müəyyən olunmuş qaydada, müəyyən olunmuş vaxtda, yüksək demokratik
standart və beynəlxalq ictimaiyyətin yüksək səviyyədə iştirakı ilə
keçiriləcək.
“Rəqiblərimizi seçkilərə hazırlaşmağa çağırıram. Xalqın
dəstəyinin olmamasına görə seçki sistemini günahlandırmasınlar.
Aydındır ki, bütün seçki sistemlərinin özünün müsbət və mənfi
tərəfləri var. Lakin hər iki seçki sistemi legitim və
demokratikdir. 2020-ci ildə seçkilər son 30 ildə olduğu kimi
qarışıq sistemlə keçiriləcək. Xatırladıram ki, 2012-ci ildə biz
zorakılıq və amansızlığı ilə seçilən və siyasi proseslərlə bağlı
bütün institutlara və alətlərə tam nəzarət edən rejimi məhz bu
sistemlə dəyişdik”, – Kaxa Kaladze deyib.
O, qeyd edib ki, hakim partiya yaranmış vəziyyətə görə maksimum
səbir göstərəcək.
“Lakin açıq şəkildə demək istəyirəm ki, destruktivlik
davam etdiyi təqdirdə hakimiyyət müvafiq reaksiya
göstərəcək”, – baş katib bildirib.