Martın 26-da Sinqapur bayraqlı yük gəmisi DALİ ABŞ-ın Merilend ştatının Baltimor şəhərində Frensis Skott Key körpüsünün dirəklərindən birinə toxunub və nəticədə körpü uçub.


Hazırda Baltimor limanında xilasetmə və axtarış işləri aparılır, onun daxilində dalğıclar suya düşən 6 işçini axtarır. Məlumata görə, gəmi körpüyə çırpılan zaman 6 nəfər körpüdə yol təmiri işləri aparırmış.

Merilend ştatının polisi və ABŞ Sahil Mühafizəsinin yüksək səviyyəli rəsmiləri bildiriblər ki, görmə məsafəsinin azalması və güclü cərəyanlar xilasetmə işlərini qeyri-mümkün edib. Nəticədə suya girdikdən 18 saat sonra işçilərin axtarışı müvəqqəti olaraq dayandırılıb.

Çərşənbə günü yerli səhər saat 6-da polis polkovniki Roland Batler itkin düşən 6 nəfərin xilas edilməsi üçün daha ətraflı axtarışların bərpa olunduğunu açıqlayıb.

Bununla belə, Sahil Mühafizəsinin yüksək rütbəli zabiti Şennon Gilreatın sözlərinə görə, "biz bu [itkin] şəxslərin heç birini sağ tapacağımızı düşünmürük."

Bundan əvvəl xilasedicilər eyni təmir işləri aparan iki işçini sudan çıxarıblar. Onlardan biri xəstəxanaya aparılıb.