Bugünkü Azərbaycan, sözün əsl mənasında, dünya miqyasında güclü
ölkələr sırasındadır.
Bu sözləri Azərbaycan Respublikasının Prezidenti İlham Əliyev yerli
televiziya kanallarına müsahibəsində söyləyib.
Bu gün ölkə qarşısında duran yeni vəzifələrin yeni dövrün
vəzifələri olduğunu diqqətə çatdıran dövlətimizin başçısı qeyd
edib:
“Biz əsas vəzifəni bir neçə ay bundan əvvəl həll
etmişik, ölkəmizin suverenliyini tam bərpa etmişik və sentyabr
hadisələri, əlbəttə ki, ümumi kontekstdən çıxarıla
bilməz”.
Əliyev yerli televiziya kanallarına müsahibəsi zamanı ikinci
Qarabağ müharibəsindən sonra baş verənlər barədə də danışıb.
“İkinci Qarabağ müharibəsindən sonra Qarabağda nələr baş
verdiyindən tam xəbərdar idik, həm vizual, həm operativ nəzarət
edirdik. Yəni, bunu Ermənistana çatdırmağa çalışırdıq ki, bu, bizim
nəzarətimizdədir və istənilən an biz əməliyyat keçirə bilərik”.
Həm Ermənistan rəhbərliyinə, həm də beynəlxalq aktorlara bir dəqiqə
ərzində düyməyə basıb bu əməliyyatı keçirəcəyini, onların heç nə də
edə bilməyəcəklərini açıq şəkildə dediyini vurğulayan dövlət
başçısı bildirib:
“Bu hadisələrin gedişatı onu göstərdi
ki, - hesab edirəm, bu, təkcə Ermənistan üçün yox, Ermənistanın
arxasında dayananlar üçün də bir dərs olmalıdır, - bizimlə
hədə-qorxu dili ilə, yaxud da təkəbbürlə davranmaq mümkün
deyil”.