28 may tarixində Tbilisidə
“Era Film” studiyası
tərəfindən lentə alınan
“Geri Dönüş” adlı filmin
təqdimatı keçirildi.
Gürcüstan Yaşılay Cəmiyyətinin
“Sağlam Yaşam Təbliği
Üsulları” layihəsi çərçivəsində çəkilən filmin mövzusu
məişət problemləri və qumarın cəmiyyətdəki fəsadlarıdır.
“Geri Dönüş” adlı filmin ssenari müəllifi və
rejissoru Elnur Vəlizadə
“Marneuli” radiosu ilə
söhbəti zamanı bildirdi ki, çəkilişlər zamanı texnika cəhətdən
problemlər yaşayıblar, amma
bunun öhdəsindən gəliblər. O, ümid edir
ki, izləyicilər filmi bəyəncəklər.
“Texniki cəhətdən bizim avadanlıqlarımız olduqca aşağı
səviyyəli idi. Bizim ehtiyacımızı qarşılayacaq avadanlıqlar yox
idi. Misəl üçün deyim ki, bizim əsas ehtiyac duyduğumuz avadanlıq,
mikrofon idi. Çalışdığımız qədər mikrofonun olmamasını filmdə hiss
etdirməmişik. Filmdə bir iki yerdə hiss edə bilərsiniz ki, orada
mikrofondan istifadə olunmayıb. Əlimizdən gələni etməyə çalışmışıq.
İzləyici üçün 30 dəqiqə film uzun görünməyə bilər, amma bu bizim ən
uzun filmimizdir. Filmimiz təxmini olaraq bir ilə ərsəyə gəldi.
Ümid edirəm ki, izləyicilər filmimizi bəyənərlər. Təriflərini və
tənqidlərini də gözləyirəm. Filmin mövzusu cəmiyyətdə var olan
ailə-məişət problemləri, maddi çətinliklərin özü ilə gətirdiyi
problemlər və bu problemlərdən qaçış yollarıdır. Bu yolda asan
gəlir mənbəyi kimi görülən, insanlara zərər verən kazinolardır. Bu
dayanacaqdan, bu səmtdən keçən insanların müəyyən qədər qazancları
ola bilər. Bu danılmaz bir faktdır. Amma bu qazanc həmin insanları,
nə qədər ayaqda saxlayır, nə qədər onların dərdinə dərman olur, bu
suallara filmdə nöqtə qoymuşuq. Onu da bildirim ki, bu bizim ilk
işimiz deyil. Bu da son işimiz olmayacaq. Bundan sonra yeni
tamaşalarla, yeni filmlərlə izləyicilərmizin qarşısında
olacağıq”, – rejissor dedi.
Gələcək planlardan danışan Vəlizadə bildirdi ki, yaxın zamanlarda
yeni tamaşalarla izləyicilərin qarşısına çıxacaqlar.
“Yaxın gələcəkdə Əbdürrəhim bəy Haqverdiyevin “Kimdir
müqəssir” əsərini səhnələşdirəcəyik. Onun ardınca isə Nikolay
Qoqolun “Bir dəlinin xatirə dəftəri” tamaşası olacaq. Orada baş
rolu mən canlandıracağam. Rejissorluğunu Anar Rafiqoğlu edəcək. İlk
sadaladığım tamaşanın rejissorluğunu isə Namiq Hacıyev öz üzərinə
götürüb. Tamaşaçıları gözəl bir səhnə əsəri gözləyir. “Kimdir
müqəssir” əsəri komediya janrındadır. Hamıya tövsiyə edirəm,
əyləncəli və çox gözəl bir tamaşa olacaq. Gəlib izləyə bilərlər.
İkinci tamaşamız isə psixoloji janrda olan bir əsərdir. Bundan
başqa qısametrajlı filmlərimizin çəkilişləri də davam edəcək. 3, 5,
7, dəqiqəlik filmlərimiz olacaq və tamaşaçılarmıza təqdim
olunacaq”, – Elnur Vəlizadə dedi.
Filmdə təxminən texniki işçilərlə birlikdə 20-yə yaxın şəxs iştirak
edib. Elnur Vəlizadənin sözlərinə görə, baş rolları Alı Şərifov,
Məryəm Əliyeva və Mayar Seydiyeva oynayıblar.
“Filmdə ikinci dərəcəli rollarda Benyamin Qasımoğlu,
Səma Sadiq, Ümman və adlarını çəkə bilmədiyim şəxslər iştirak
etdilər. Bundan başqa epizodik rollarda yer alan dostlarımız da
oldu. Ümid edirəm ki, oyunçuluq, aktyorluq da tamaşaçının xoşuna
gələcək. Film Tbilisidə lentə alındı. Filmin ərsəyə gəlməsində bizə
dəstəyi “Yaşılay” cəmiyyəti göstərdi. Bizlərə dəstək olduğuna görə,
onlara da öz təşəkkürümüzü bildiririk. Bizə media dəstəyini
report.az göstərdi. Onlar texniki cəhətdən bizə köməklik
göstərdilər. Onlara da təşəkkürümüzü bildiririk”, –
Elnur Vəlizadə dedi.
Baş rolda yer alan Alı Şərifov bildirdi ki, filmin çəkilişlərininə
çox əmək sərf ediblər. Çəkilişlər zamanı çox problemlərlə
qarşılaşıblar və onların da öhdəsindən gəlməyi bacarıblar.
“Əvvəllər mən “Era film”in kiçik qısametrajlı filmində epizodik
rolda yer almışdım. Orada da çox görünmürdüm. Daha sonra bizim bir
filmimiz olmalı idi. Onun da hazırlıqları gedirdi. Hətta kadrları
da çəkmişdik. Orada da epizodik rolda oynayacaqdım. Məlum məsələyə
görə, koronavirus pandemiyası elan olundu və işlərimiz dayandı. Ən
sonda bu layihədə baş rol oynamaq təklifini aldım. Mənə dedilər ki,
burada baş rolda oynaya bilərsənmi. Mən də can-başla razı oldum. Bu
mənim üçün xoşdur. Filmin çəkilişlərində çox əziyyətlər çəkdik.
Hava və texnika baxımından problemlər oldu. Bunlar bizə problem
yaratsa belə, biz bunun öhdəsindən gəldik və artıq bizim filmimiz
hazırdır. Ümid edirəm ki, izləyicilərmiz bu filmi bəyənəcəklər. Biz
bu filmə çox əmək çəkdik və əlimizdən gələni etdik. Bundan sonra da
filmlərdə iştirak etməyi düşünürəm. Mən bu işi çox sevirəm. Belə
deyim, aktyorluq, oyunçuluq, film mənim üçün ikinci bir nəfəs
kimidir. Başardığım qədər yeni layihələrdə iştirak edəcəyəm və vaxt
ayıracağam”, – Alı Şərifov dedi.
“Tiflis Palace” otelində baş tutan tədbirdə
“TİKA”-nın Tbilisi koordinatorunun müavini Saliha
Güner Bayraktar, Türk Hava Yollarının Gürcüstan rəhbəri Şerafettin
Ekici, QHT, Gürcüstan Yaşılay Cəmiyyətinin üzvləri, media
nümayəndələri və dəvət olunmuş qonaqlar iştirak edirdilər.
Qeyd edək ki,
“Geri Dönüş” adlı filmin yaxın
günlərdə başqa regionlarda da təqdimatı planlaşdırılır. Daha sonra
isə sosial medialarda paylaşılacaq.