Müxalifət seçkilərdə baş verən qanun pozuntularını əks etdirən video görüntülər yayıb
16:05 / 19.05.2019
“Vahid Milli
Hərəkat – Birləşmiş müxalifət” Marneulidə seçkilərin gedişi ilə
bağlı brifinq verib. Partiyanın liderlərindən olan Zurab
Melikişvili bildirib ki, hakimiyyət öz istədiyi namizədi “Marneuli
əhalisinin başına gətirmək” üçün misli görülməmiş saxtakarlıq
yoluna baş vurub və bütün mövcud metodlardan istifadə edir.
“Hakimiyyət kameraların söndürülməsi kimi yollara baş vurur və
artıq o səviyyəyə çatıb ki, kameraların sönmüş vəziyyətdə qalması
üçün uzadıcı kabeli belə oğurlayırlar”, – Zurab Melikişvili
deyib.
Brifinqdə partiya qanun pozuntularının əks
olunduğu üç video yayımlayıb.
Partiyanın bildirdiyinə görə, 68 saylı məntəqədə bülletenlərin
məntəqədən çıxarılması halı qeydə alınıb.
Partiyanın yaydığı videolardan birində
Şaumyanidə yerləşən 9 saylı məntəqədə komissiya üzvü mədəniyyət
evinin rəhbəri ilə siyahıları müqayisə edərək seçiciləri yoxlayır,
məsələnin üstünün açıldığını hiss etdikdə və kameranı gördükdə isə
seçki məntəqəsindən qaçır.
Partiya tərəfindən yayımlanmış üçüncü videoda isə
bir nəfər kişinin seçki məntəqəsinin yaxınlığında durduğu və
əlindəki siyahı ilə səs verməyə kimin gəlib, kimin gəlmədiyini
yoxladığı əks olunub.
Zurab Melikişvili brifinqdə onu da qeyd etdi ki, qeyri-hökumət
təşkilatlarının və partiyaların nümayəndələrinin pozuntularla bağlı
göstəriş verdikləri məntəqələrdə onlar məntəqələrdən
kənarlaşdırılırlar. Melikişvilinin dediyinə görə, belə hallar
Marneulidə 1, 4, 84 və 85 saylı məntəqələrdə baş verib.
19 may 2019-cu ildə Gürcüstanda növbədənkənar seçkilər keçirilir.
Mer vəzifəsinə seçiləcək namizəd bu vəzifədə 2021-ci ildə
keçiriləcək yerli özünüidarə seçkilərinədək qalacaq.