Gürcüstanın baş naziri İrakli Kobaxidzenin bəyanatına görə, təbii
fəlakət bölgəsində yaşayan
296 ailə təhlükəsiz yerə köçürülüb və zərərçəkmiş ailələrə müvafiq
kompensasiyanın verilməsi üçün sənədlər hazırlanır.
Kobaxidzenin rəhbərlik etdiyi hökumətin ilk iclasında bildirdiyi
kimi, lazım gələrsə, zərərçəkənlərə yardım üçün mərkəzi büdcədən
pul ayrılacaq.
“Ötən həftə bizim üçün çox ağrılı oldu. Təbii
fəlakətlər və qəzalar nəticəsində 14 nəfər həyatını itirib. Bir
daha mərhumların ailə üzvlərinə və yaxınlarına başsağlığı verirəm.
Ləğvetmə işləri ilə yerindəcə tanış oldum və qeyd etmək istərdim
ki, istər dövlət qurumları, istərsə də yerli hakimiyyət
nümayəndələri çox böyük işlər görüblər. Çox tez hərəkət etdilər,
elektrik enerjisi və təbii qazın verilişi çox tez bərpa olundu.
Həmçinin avtomobil yolları çox sürətlə təmizlənib, müvafiq
hissələrdə avtomobillərin hərəkəti bərpa edilib. 400-ə yaxın
yaşayış evi su altında qalıb, onlardan 300-dən çoxunda nasos işləri
artıq yekunlaşıb. Yekun hesabat hazırlanmamış 296 ailə təhlükəsiz
yerə köçürülüb. Dəymiş ziyan da qiymətləndirilib. Müvafiq ailələrə
kompensasiyaların verilməsi üçün müvafiq sənədlər hazırlanır. Lazım
gələrsə, mərkəzi büdcədən vəsait ayrılacaq. Mən təbii fəlakətin
nəticələrinin aradan qaldırılmasında ən fəal iştirak edən aidiyyatı
nazirliklərə - Daxili İşlər Nazirliyinə, İnfrastruktur Nazirliyinə,
Ekologiya Nazirliyinə, həmçinin, hökumət administrasiyasının
regional şöbəsinə, yerli hökumət nümayəndələrinə, xilasedicilərə,
bu işlərdə əməyi olan bütün insanlara təşəkkürümü
bildirirəm”, - deyə İrakli Kobaxidze bildirib