Təşkilat qrupunun hər il hazırladığı Münhen Təhlükəsizlik
Konfransının 2024-cü il hesabatında hakim partiyanın qurucusu
Bidzina İvanişvilinin adı rusiyayönlü oliqarx kimi göstərilib.
Hesabatda bildirilib ki, İvanişvili Gürcüstanın demokratik
tənəzzülünə görə məsuliyyət daşıyır.
“Rusiya ola bilsin ki, Gürcüstanı, Moldovanı və Qərbi
Balkanları öz düşərgəsinə daxil edə bilməyib, lakin hələ də onların
Qərbə inteqrasiyasının qarşısını almağa çalışır. Rusiyayönlü
oliqarx və Gürcüstanın hakim partiyasının qurucusu Bidzina
İvanişvili ölkənin son demokratik geriləməsi və onun Gürcüstan
əhalisinin əksəriyyətinin istəklərinə zidd olan Aİ kursundan kənara
çıxmasına görə məsuliyyət daşıyır”, - deyə hesabatda
bildirilib.
Münhen Təhlükəsizlik Konfransı fevralın 16-dan fevralın 18-dək
keçiriləcək. Bu gün mətbuatda xəbər verildiyi kimi, Gürcüstan
prezidenti Salome Zurabişvili hökumətdən razılıq almasa da,
konfransa gedəcək. Məlumata görə, konfransda Gürcüstanın rəsmi
nümayəndəsi xarici işlər naziri olacaq, yeni baş nazir İrakli
Kobaxidze isə iştirak etməyəcək.
Prezident administrasiyasının məlumatına görə, Salome Zurabişvili
Münhendəki beynəlxalq konfransdan rəsmi dəvət alıb və iştirak
etməyi planlaşdırır.