Gürcüstan Xarici İşlər Nazirliyi (XİN) qarşıdan gələn parlament
seçkilərinə müşahidəçilər dəvət etmək məqsədilə
ATƏT-in Demokratik Təsisatlar və İnsan Haqları Bürosunun (DTİHB)
direktoru Matteo Mekaççiyə məktub göndərib.
Bu barədə XİN-in məlumatında deyilir.
“Qeyd edilib ki, hakimiyyətin məqsədi beynəlxalq
standartlara və qabaqcıl Avropanın demokratik təcrübələrinə uyğun
şəffaf, azad və ədalətli seçkilər keçirməkdir. Bu səbəbdən
Gürcüstan hökuməti ATƏT/DTİHB nümayəndələrini 2024-cü ildə ölkədə
keçiriləcək parlament seçkilərini müşahidə etməyə
çağırır”, - məlumatda bildirilib.
Məktubda vurğulanıb ki, Gürcüstan müşahidəçilərin öz funksiyalarını
səmərəli yerinə yetirməsinə mümkün qədər kömək etməyə hazırdır.
Xatırladaq ki, Gürcüstanda parlament seçkiləri oktyabrın 26-da
keçiriləcək.