„მოქალაქეების” ლიდერი, ალეკო ელისაშვილი საგამოძიებო სამსახურში გამოკითხვაზე იმყოფებოდა. გამოკითხვიდან გამოსვლის შემდეგ, ელისაშვილი ამბობს, რომ ეს გამოკითხვა ფორმალობაა. არ სჯერა, რომ მისი ცემის საქმეს სამართლიანად გამოიძიებენ და დასჯიან იმ პოლიციელებს, რომლებმაც მასზე იძალადეს.

ელისაშივლის თქმით, თუ გამოძიება სჭირდებათ, არსებობს კადრები, რომელშიც ჩანს, როგორ უსწორდებიან მას აქციაზე სამართალდამცველები.

ოპოზიციონერი დეპუტატი ამბობს, რომ ეს იყო „სადამსჯელო ოპერაცია, მდინარაძემ ვერ გაბედა ჩემთვის პასუხის გაცემა, პოლიციელები დამასია ტურებივით” – თქვა მან.

„წყალწყალა პროცედურაა. ამათი გამოძიება არ გაიშვა. კანონმდებლობას პატივს ვცემ და ამიტომ ამ ფორმალობასაც დავიცავ, გავყვები [გამოძიებას], თორემ გამოძიება თუ უნდათ, არსებობს კადრები, სადაც ყველაფერი ხელის გულზეა, სახეები ჩანს… ეს იყო გაჩაღებული ცემა-ტყეპა, სადამსჯელო ოპერაცია. მშიშარა და ლაჩარმა მდინარაძემ რომ ვერ გაბედა ჩემთვის პასუხი დაებრუნება, პოლიციელები დამასია თავზე, ბოდიშს ვიხდი, ისინი პოლიციელები არ არიან, ვინც მე მირტყამდა ისინი არიან „ძაღლობა”, საბჭოთა დროს რომ პოლიციას ეძახდნენ, იმათი მენტალური შთამომავლები არიან ესენი, თორემ მე პოლიციელებს პატივს ვცემ, კანონის დამცველ პოლიციელებს, მაგრამ რა კანონს იცავდნენ ესენი? კადრები რომ ვნახე, უფრო დავიძაბე, მაგდენი თუ მომხვდა არ მახსოვდა… 18 წლიანი მუხლია, ჯგუფური დანაშაულია, უფლებამოსილების გადამეტებაა, მარა აგერ ნახავთ გამოაძვრენენ”, – უთხრა ელისაშვილმა ჟურნალისტებს.

ალეკო ელისაშვილის თქმით, 17 აპრილს, კანცელარიასთან მიმდინარე აქციაზე პოლიციელები სასტიკად გაუსწორდნენ – მისი თქმით, აქვს ნეკნის მოტეხილობა, დაზიანებები მთელს სხეულზე.

„იყვნენ აბსოლუტურად დაუნდობლები, ძირს ვეგდე და მირტყამდნენ პირდაპირ წიხლებს და მუხლებს”, – თქვა ელისაშვილმა.

---

„ქართული ოცნება“ კიდე ერთხელ აპირებს რუსული კანონის მიღებას, რომელიც 2023 წლის მარტში მასობრივი პროტესტის შედეგად უკან გაიწვიეს. „ქართულმა ოცნებამ“ გასულ წელს დადო პირობა, რომ რუსულ კანონს აღარ დაუბრუნდებოდნენ, მაგრამ პირობა დაარღვია. ქართულმა ოცნებამ კანონპროექტის პირვანდელი ფორმულირებიდან მხოლოდ სიტყვა "აგენტი" ამოიღო და ის უცხოური ძალის ინტერესების გამტარებლით შეცვალა.
კანონის მიხედვით, ყველა არასამთავრობო და მედიაორგანიზაცია, რომლის შემოსავლების 20%-ზე მეტი უცხოეთიდან არის მიღებული უცხოური ძალია ინტერესების გამტარებლად ჩაითვლება. სახელმწიფო არ გამოიკვლევს თუ რას საქმიანობენ და რა მიზნებს ემსახურებიან ეს ორგანიზაციები და მათ ყველას უცხოური ძალის ინტერესის გამტარებლად შერაცხავს.
კანონი მიმართულია ევროპასა და ამერიკისაგან შემოსულ დაფინანსებებზე და არა მტრულად განწყობილი ქვეყნებიდან შემოსულ დაფინანსებებზე, როგორც ეს ცივილიზებულ ქვეყნებშია.
კანონის ინიცირების გამო შეშფოთება გამოთქვეს ევროკავშირის წევრმა და საქართველოს მეგობარი ქვეყნების ლიდერებმა, რუსეთის პრეზიდენტის პრესმდივანმა კი „ქართული ოცნების“ კანონი მოიწონა.