"Davit Qareci ətrafında yaranmış vəziyyət Gürcüstan vətəndaşı olan azərbaycanlıların günahı deyil" – Oqtay Kazımovun yazısı
Yazı
ilk olaraq „Liberal“
tərəfindən yayımlanıb.
Müdafiə və əlavədən bir neçə şeyin keçmiş
naziri İrakli Okruaşvili, özünün Davit Qareci monastırı ətrafında
cərəyan edən hadisələr barəsindəki “havayı məsləhəti” ilə, 80-ci
illərin sonu, 90-cı illərin birinci yarısında Gürcüstanda hökm
sürən və bu gün də belə sönməmiş olan əhval ruhiyyəni, Mariam
Caşinin dediklərindən daha kəskin şəkildə, bütün çılpaqlığı ilə
sərgiləmişdir. Həmin əhval-ruhiyyəyə görə, etnik azlıqlar (söz
etməsə də, dini azlıqları da həmin qazanda qaynadır) təhlükə
mənbəyi, Gürcüstanın inkişafını gözü götürməyən parazit kütlədir və
“qonaq kimi yaşamaları” hər bir aqilanə vaxtı aşdığı üçün
Gürcüstandan atılmalıdır.
Lakin, cənab İraklinin söylədiyində güclü bir yenilik də sezilir –
o, 2005-ci ildə, Azərbaycan Respublikasının Daxili İşlər naziri ilə
söhbətində Gürcüstanın 500 min (hazırkı rəsmi məlumatlara görə, 233
min) etnik azərbaycanlı əhalisindən olduqca məharətlə və sərfəli
istifadə edə bilmişdir, yəni, 90-cı illərin siyasətçiləri kimi
ümumiyyətlə, ucdantutma qovulmalarını buyurmamış, onlardan təzyiq
aləti kimi istifadə etməyi bacarmış və istəyinə də nail ola
bilmişdir.
“Əl-qərəz və kəlimətul müxtəsər” cənab İraklinin bu cür “məharətlə”
qurduğu “hoqqalar” yalnız və yalnız 90-cı illərin birinci yarısında
xalq arasında tam dəstək ala bilərdi, ancaq nə etməli ki, artıq
dövr azca dəyişmişdir. Cəmiyyətin bəlkə də az, ancaq heç də
əhəmiyyətsiz olmayan hissəsi bu cür emosional qeyzə gəlmələri
alqışlamır. Cənab İrakli üçün daha betər - 10 ildən çoxdur ki,
gürcücə bilənlərin, gürcücə təhsil alanların sayı artır və onlar
üçün bu kimi bəyanatlar heç də “ara sözləri” deyildir – onlar
oxuyur, narahat olur, tərcümə edir, yayır, danışır və müzakirə
edirlər. Həm də bütün bunları Gürcüstan Konstitusiyası çərçivəsində
və kontekstində edirlər. O Konstitusiyanın ki, onda hər bir
vətəndaş eyni hüquqlardan faydalanır və eyni öhdəliklərə boyun
olur.
Okruaşvilinin bütün bu tiradasında, 90-cı illərin sözügedən
əhval-ruhiyyəsindən əlavə, bu kimi şeylər də görünməkdədir:
a) etnik azlıqları tamhüquqlu vətəndaşlar kimi qəbul etməmək;
b) etnik azlıqları qonşu dövlətlərin təsiri altında görmək - onun
fikrincə etnik azlıqlar iki ağızlı qılınc kimidir – ya Gürcüstan
Hökuməti yetirib onlardan qonşu dövlətlə ticarət predmeti kimi
istifadə edəcək, yaxud da, qonşu ölkə üstələyib onları Gürcüstanla
ticarətdə bir predmet kimi bəri işə salacaqdır;
c) siyasi cəhətdən nazlanmaq və xristian, etnik gürcü seçicinin
duyğuları ilə oynamaq;
ç) və ən əsası – antidövlət, diskriminativ, nifrət dili ilə
damğalanmış, fəsad toxumları əkən ritorika
.
İndi isə bütün bunlara işıq tutmağa biz cəhd edək:
• Gürcüstanın azərbaycanlı əhalisi bu ölkə saysız krallıq və
knyazlıqlara bölündükdə belə sədaqətli olubdur. Aspindza və
Krtsanisi müharibəsində Xudu Borçalının (gürcü tələffüzü ilə Xutia)
başçılığı ilə, borçalılar qvardiyası İkinci İrakli ilə yan-yana
vuruşurdu. Ancaq indiyə kimi biz yalnız 300 Araqvelinin
qəhrəmanlığı haqqında eşitmişik (Niyə bəs?!). İkinci İraklinin
şəxsi mühafizəsində, bəzi məlumata görə, cangüdənlərinin 12-dən
5-i, bəzi məlumata görə isə 12-dən 7-si bugünkü borçalıların
əcdadları idilər. Krtsanisi müharibəsindən sonra şahı qorumaq
əməliyyatında Xevsurlarla birlikdə yüzə qədər borçalı sakini də
İkinci İrakli uğrunda can vermişdir. Gürcüstanın birinci
respublikası dövründə, 1918-ci ildə borçalılar bir dəstə yaratdılar
və həmin müharibədə göstərdiyi igidliyə görə pulemyotçu Çopur Əli
dövlət ordeni ilə belə təltif olundu. Gürcüstanın ərazi bütövlüyü
uğrunda 90-cı illərdə və 2008-ci ildə də kifayət qədər azərbaycanlı
vuruşurdu.
• Azərbaycanlılar Gürcüstanda daxili məhsul və maddi var yaradır,
vergilərini ödəyir və hərbi qulluğa gedirlər. Ali məktəblərdən
məzun olanlar maarifləndirmə işləri aparır, şagirdlərə gürcü
dilindən və başqa fənlərdən könüllü dərs deyir, müxtəlif tarixi
yerlərə ekskursiyaya aparırlar.
Və yenə də buna baxmayaraq:
• Onlar heç bir qərar qəbul edilməsi prosesində geniş təmsil
olunmurlar (Parlament üzvlərinə işarə etməyin, dördündən ikisi heç
ümumiyyətlə gürcücə bilmir və gürcü dilini bilən və təhsilli
azərbaycanlılar deyil, niyə məhz onlar orda əyləşiblər sualını
Okruaşvili kimi “siyasətçilərə” verin). Məsələn, 2005-ci ildə
Okruaşvili qonşu ölkənin naziri ilə görüşə hansı azərbaycanlını da
aparadı ki, indi səslərini ucaltmağa çağırır? Yaxud da, sərhədlərin
delimitasiya prosesinə hansı azərbaycanlı cəlb olundu ki, o da
durub Gürcüstanın mövqeyinə zidd bir şey demiş olsun? – heç
bir.
• Cənab İrakli necə düşünür, Gürcüstan vətəndaşlarını qonşu
ölkələrə sırımaqla, qonşu ölkənin hərəkətinin cavabını bunlardan
almaq arzusu ilə, acığını bunlardan çıxmaq niyyəti ilə dövlətin
nəfinəmi düşünür?!
Davit Qarecinin ətrafında yaranmış qalmaqal Gürcüstan vətəndaşı
olan azərbaycanlıların günahı deyildir. Onlardan nə Gürcüstan
Hökuməti fikir soruşur, nə də ki Azərbaycan. Cənab İraklinin bir
özü aynaya baxaraq düşünsün ki, əcəba, naziri olduğu hakimiyyətin
özü niyə bu məsələni vaxtında həll edə bilmədi?
Bundan əlavə şəxsən özü ki, bu qədər təcrübə sahibi olan
diplomatımız və məsələləri yoluna qoymaqda mahirimizdir.
P.S. Məlumat üçün, bütün bunları mən - Qədim Gürcü Ədəbiyyatı
Tarixi üzrə mütəxəssis, azərbaycan mənşəli partiyasız gürcü – Oqtay
Kazımov - yazmışam.