დღეს პარლამენტმა კენჭი უყარა ახალი წევრის, არჩილ გორდულაძის მიღებას. 77 ხმით 0-ის წინააღმდეგ გორდულაძე პარლამენტის ახალი წევრი გახდა. კენჭისყრას არ ესწრებოდა ოპოზიციონერი დეპუტატების აბსოლუტური უმრავლესობა. სხდომის დაწყებისას დარბაზში მხოლოდ “გირჩის” წევრი, ვახტანგ მეგრელიშვილი იყო.

არჩილ გორდულაძე გია ცაგარეიშვილს ჩაანაცვლებს, რომელიც რამდენიმე დღის წინ ჯანდაცვის მინისტრის მოადგილედ დაინიშნა.

გორდულაძე 2023 წლიდან დღემდე იყო თბილისის საკრებულოს იურიდიულ საკითხთა და ადამიანის უფლებათა დაცვის კომისიის თავმჯდომარე. საკრებულოს ვებ-გვერდზე გამოქვეყნებული ინფორმაციის თანახმად, იქამდე წლების განმავლობაში მუშაობდა პარლამენტში: ჯერ ფრაქცია “ქართული ოცნების” აპარატის იურიდიული მიმართულების ხელმძღვანელად, შემდეგ კი, ამავე ფრაქციის აპარატის უფროსად.

არჩილ გორდულაძეს ბაკალავრისა და მაგისტრატურის ხარისხი თბილისის სახელმწიფო უნივერსიტეტში, იურიდიული ფაკულტეტზე მიიღო. ამჟამად არის ამავე უნივერსიტეტის დოქტორანტი. 2019-2020 წლებში იყო უნივერსიტეტის მოწვეული ლექტორი.

რაც შეეხება გია ცაგარეიშვილს, პარლამენტში ყოფნისას მან მხარი დაუჭირა რუსული კანონის მიღებას, რომელიც ქვეყანაში ზღუდავს სამოქალაქო ორგანიზაციებსა და მედიას. დასავლეთის სახელმწიფოები აცხადებენ, რომ საქართველოს ევროკავშირში გაწევრების პროცესი ამ კანონის მიღების გამო შეჩერებულია.