სამენეჯერო სააგენტო Transfermarkt-ის სტატისტიკით, ამ დროისთვის საქართველოს ეროვნული ნაკრები 161.05 მილიონი ევროს ღირებულებით მსოფლიოს 247 ეროვნულ ნაკრებს შორის 38-ე ადგილზეა და თურქეთის გარდა, ყველა მეზობელ ქვეყანასთან შედარებით წამყვან პოზიციაზე იმყოფება.

მე-18 პოზიციაზეა თურქეთის ეროვნული ნაკრები და ის 324.10 მილიონი ევრო ღირს. კიდევ ერთი მეზობელი ქვეყანა რუსეთი, 142 მილიონი ევრო ღირს და ის 40-ე ადგილზეა. მსოფლიო ქვეყნების ნაკრებებს შორის 71-ე პოზიციაზეა სომხეთის ეროვნული გუნდი. ამ დროისთვის მისი საბაზრო ღირებულება 36.05 მილიონ ევროს შეადგენს, რაც შეეხება აზერბაიჯანის ეროვნულ ნაკრებს, ის 14.20 მილიონი ევროს ღირებულებით ჩამონათვალში 103-ე ადგილზეა.

„ბიზნესპრესნიუსი“ გთავაზობთ, ყველაზე ძვირადღირებული ეროვნული ნაკრებების ტოპ-10-ეულს:

• ინგლისი - 1.52 მლრდ ევრო
• ბრაზილია - 1.27 მლრდ ევრო
• საფრანგეთი - 1.23 მლრდ ევრო
• პორტუგალია - 1.05 მლრდ ევრო
• ესპანეთი - 965.50 მლნ ევრო
• გერმანია - 831 მლნ ევრო
• ნიდერლანდები - 815 მლნ ევრო
• არგენტინა - 805 მლნ ევრო
• იტალია - 705 მლნ ევრო
• ბელგია - 584 მლნ ევრო

შეგახსენებთ, რომ ევროპის ჩემპიონატზე გუშინ, ჯგუფური ეტაპის მესამე მატჩში საქართველომ პორტუგალიის ნაკრები 2:0 დაამარცხა. ამ შედეგით საქართველოს ნაკრებმა 4 ქულა მოიპოვა და ევროპის ჩემპიონატზე მერვედფინალში გავიდა.

მატჩის პირველი გოლი შეხვედრის დაწყებიდან მეორე წუთზე ხვიჩა კვარაცხელიამ გაიტანა, ხოლო მეორე გოლი, მეორე ტაიმში, გიორგი მიქაუტაძემ.