Gürcüstan Parlamentinin keçmiş deputatı Azər Süleymanov “Vahid
Milli Hərəkat” partiyasından ayrılıb. O, bu barədə öz “Facebook”
səhifəsində paylaşım edib.
Süleymanov partiyadan ayrılmağın onun üçün çətin qərar olduğunu
yazıb. O, siyasi fəaliyyətini müvəqqəti olaraq dayandırdığını
bilidirib və VMH partiyasından ayrılmağına səbəb kimi partiyada
bəzi insanların onların fəaliyyətlərini düzgün şəkildə
qiymətləndirməmələrini yazıb.
Süleymanovun paylaşımını təqdim edirik:
“Əziz həmvətənlilərim!
İllərdir ki, hər çətin vəziyyətdə mənimlə birgə oldunuz, heç bir
vaxt dəstəyinizi əsirgəmədiniz. Hər zaman qürur və iftixar mənbəyim
oldunuz. Bunun üçün hər birinizə dərin minnətdarlığımı bildirirəm!
Ola bilsin, bu illər ərzində sizlərə qarşı hansısa səhv bir addımım
olub, buna görə sizlərdən üzr istəyirəm.
Mənim üçün asan olmasa da, mən bu gün çox çətin bir qərar verməli
oluram. İllərdir ki, siyasi yolda birlikdə olduğum Vahid Milli
Hərəkat partiyasını tərk edirəm. Bundan sonra siyasi fəaliyyətimi
müvəqqəti olaraq dayandırıram. Bu qərarın səbəbi partiyada olan
bəzi insanların bizim xidmətlərimizi və siz seçicilərin fikirlərini
layiqli şəkildə dəyərləndirməmələri oldu. Son bir ildə baş verən
hadisələr bunun bariz nümunəsidir.
Mənim partiyadakı çoxlu sayda dostlarıma olan hörmətim naminə bəzi
təfərrüatları açıqlamaq istəmirəm. Düşünürəm ki, bütün bunlara
rəğmən VMH partiyasında öz fəaliyyətimi davam etdirməyim sizlərə
qarşı haqsızlıq olar.
Hər birinizə təşəkkür edirəm!”