İki aydır Marneulidə işləyən gürcü dili ikinci dil kimi fənn
müəllimləri gediş haqqı üçün ayrılmış pulu ala bilmirlər. Bələdiyyə
miqyasında gediş haqqı ödənilən 98 belə pedaqoq var.
Onların əksəriyyəti Tbilisidən gəlir. Marneuli meriyası onlara gər
ay 50 lari ödəyir. Yerli özünüidarədə pulun verilməsi vaxtının
uzadılmasına səbəb olaraq sənədlərin yenilənməsini qeyd edirlər.
Pedaqoqlardan sənədləri tez toplamağı tələb ediblər.
“Sənədləri təqdim etməyimizi tələb etdilər. Həmin
sənədləri 10 gün ərzində almaq pulsuzdur. Ancaq təcili surətdə
verməyimizi istədiklərinə görə, hamımız 15-20 lari ödədik. Marneuli
meriyasının başqa şəhərlərdən gələn gürcü dili müəllimlərinə artıq
illərdir, ödədiyi gediş haqqı hələ də köçürülməyib”,
– Daştəpə məktəbinin gürcü dili ikinci dil kimi fənn müəllimi
Natali Samxaradze bildirdi.
“Gediş haqqı üçün 50 lari köçürürlər, bu bizim üçün çox
əhəmiyyətlidir. Ötən ay dedilər ki, arayışları toplamalıyıq.
Əksəriyyət təcili surətdə yaşayış yeri barədə arayış düzəltdirdik
və bu 20 lariyə başa gəlir. Bir qayda olaraq köçürülməli idi, ancaq
hələ köçürülməyib”, – kimliyinin bilinməsini istəməyən daha bir
müəllim bildirdi.
Məlumatı aydınlaşdırmaq üçün Marneuli meriyası ilə əlaqə saxladıq.
Səhiyyə, Sosial Təminat, Mədəniyyət, İdman, Uşaq Hüquqlarının
Müdafiəsi və Dəstək Göstərmə Xidmətinin rəhbəri Qiorqi
Meurmişvilinin bildirdiyinə görə, müəllimlərə iki gün ərzində pul
köçürüləcək.
“Mən sərəncamı artıq göndərmişəm və bu gün və ya sabah
pul köçürüləcək. Bəzisi sənədləri gətirməmişdi və hamının
gətirməsini gözlədik. 2 iyunda bütün sənədlər
toplandı”, – Qiorqi Meurmişvili bildirdi.
Yerli Təhsil Resurs Mərkəzinin nümayəndəsi İrma Davadze bildirdi
ki, Marneuli meriyası 50 larinin ödənməsi barədə sərəncamı artıq
hazırlayıb və bu yalnız qeyri-gürcüdilli məktəblərin gürcü dili
ikinci dil kimi fənn pedaqoqlarına aiddir. Söhbət şəhərdən və ya
qonşu bələdiyyələrdən gələn müəllimlərdən gedir.