Marneuli yerli özünüidarəsi şəhərin Rustaveli küçəsinin tam
bərpasını və yenidənqurmasını planlaşdırır. Meriya layihə
sənədlərinin tərtib edilməsi üçün 118 000 lari dəyərində tender
elan edib.
Mərkəzi küçənin təxmini uzunluğu 2 750 metrdir. İşlər 26 may
küçəsindən başlayacaq və Səməd Vurğun küçəsi ilə kəsişmədə başa
çatacaq. Layihə sənədlərinin izahatında kanalizasiya şəbəkəsinin
qurulacağı, avtomobil dayanacağı məkanları nəzərdə tutulacağı və
qadağanedici tənzimləyici nişanların yerləşdiriləcəyi, fiziki
imkanları məhdud şəxslər üçün uyğunlaşdırılmış keçidlərin,
səkilərin qurulacağı və s. qeyd olunub.
“Layihədə nəzərdə tutulan küçədə dörd nəqliyyat qovşağı
var: 26 may meydanı, Durmuşxan Mağalaşvili adına körpü, bazar
nəqliyyat qovşağı, Səməd Vurğun dairəsi. Nəqliyyat və dayanacaq
şəbəkəsi nizamsızdır. Avtomobillər xaotik şəkildə park edilir.
Bələdiyyə nəqliyyatı üçün dayanacaqlar yoxdur. Günün müəyyən
qismində küçə dolur və tıxaclar yaranır. Məişət tullantısı qabları
küçəyə qoyulub və onlar üçün demək olar, məhdudiyyət yoxdur.
Küçənin bütün məsafəsi boyunca yüksək təzyiqli qaz borusu keçir və
bəzi yerlərdə üzdə, səkidə quraşdırılıb. Qeyd olunan yolun asfalt
qatı xarab olub, oyuqlar, uzununa və eninə çatlar var. Piyadalar
üçün nəzərdə tutulmuş səkidə analoji sıradan çıxma halları qeydə
alınır. Layihədə nəzərdə tutulmuş yolun uzunu və eni normalara
uyğun deyil. Bu isə piyada və nəqliyyat vasitələrinə təhlükəsiz
hərəkət etməyə mane olur”, – layihə obyektinin
izahatnaməsində yazılıb.
Marneuli bələdiyyəsi 20 iyun tarixində layihə sənədlərinin tərtib
edilmə xidməti üçün tender elan edib. Tenderdə iştirak etmək istəyi
olan namizədlər 5-8 iyulda təkliflərini təqdim edə bilərlər.
Layihənin tərtib edilməsindən sonra meriya işlərin başlanması üçün
tender elan edəcək. Rustaveli küçəsinin tam bərpa/yenidənqurma
işlərinin təxmini dəyəri 7 000 000 laridir.
Müqavilənin qüvvədə qalacağı müddət imzalandığı gündən 2023-cü ilin
31 yanvar tarixinə qədər müəyyən edilib.