1 mart tarixində Bolnisi bələdiyyəsinin Savaneti (İmirhəsən)
kəndində İcma Mərkəzi açılıb.
Mərkəz “Yeni Düşüncə İnstitutu” tərəfindən BMT-nin İnkişaf Proqramı
(UNDP) və Norveçin dəstəyi ilə açılıb. Savaneti İcma Mərkəzinin
açılışında Norveçin Gürcüstandakı səfiri Berqliot Hovladi iştirak
edib. O, “Marneuli” radiosu ilə söhbəti zamanı bildirdi ki, bu
məkan yerli sakinlər üçün vacibdir.
“Savanetidə İcma Mərkəzinin açılışında iştirak etdiyim
üçün çox xoşbəxtəm. Bu layihə UNDP ilə əməkdaşlıqla Norveç
tərəfindən dəstəklənir. Layihənin bir hissəsi Gürcüstanın bir neçə
yerində icma məkanlarının açılması üçün dəstəklənib. Bu əsasən icma
mərkəzlərinin iştirakına, gənclər arasında dialoqa və etnik
azlıqlar arasında iştirakın gücləndirilməsinə dəstək olmaqdır.
Gənclərin təlim-kurslarda iştirak etmək, öz bacarıqlarını kəşf
etmək imkanı olacaq. Eləcə də öz hüquqları, imkanları haqqında
məlumat ala biləcəklər”, – Berqliot Hovladi
bildirib.
Savaneti İcma Mərkəzinin rəhbəri Rezo Həsənov bildirir ki, bu
məkanda qadınların, gənclərin və kənd sakinlərinin inteqrasiya
olmaq imkanı olacaq, eləcə də öz bacarıq-təcrübələrini bir-biri ilə
bölüşə biləcəklər.
“Savaneti kəndində bu günə qədər icma mərkəzi, nə də
gənclər mərkəzi yox idi. Bu mərkəz Savaneti və ətraf kəndlərə
xidmət göstərəcək. Mərkəzdə təmənnasız sənədlərin surətinin
çıxarılması, kompüter xidməti, tərcümə və s. olacaq”,
– Rezo Həsənov bildirir.
Yeni Düşüncə İnstitutunun təsisçilərindən biri Kamran Əfəndiyevin
sözlərinə görə, mərkəz inkişaf üçün mühüm yer olacaq, insanlar
burada öz bacarılqarını kəşf edə biləcəklər.
“İcma Mərkəzi inkişaf, demokratiya deməkdir. Yerli
əhali və özünüidarə aarsında körpüdür. Mən düşünürəm ki, bir neçə
ilə biz burada həqiqi inkişaf, gənclərin motivasiyasını görəcəyik.
Daha çox gənc ali təhsil müəssisəsinə qəbul olacaq, işlə təmin
olunacaqlar və ölkənin inkişafına öz töhfələrini
verəcəklər”, – Kamran Əfəndiyev bildirir.
Mərkəzin açılış tədbirincə BMT-nin İnkişaf Proqramının Gürcüstanda
daimi nümayəndəsinin səlahiyyətlərini icra edən Daqlas Uebi,
Barışıq və Dövlət naziri Aparatının Kvemo Kartlidə nümayəndəsi Anar
Süleymanov, yerli pedaqoqlar, şagirdlər, digər maraqlanan şəxslər
iştirak ediblər.