"Gürcüstanda tikilən məscidlər
Qafqaz memarlıq üslubuna uyğun tikilməlidir" - bu
barədə "Marneuli" radiosu ilə söhbəti zamanı Gürcüstan Müsəlmanları
İdarəsinin (GMİ) şeyxi Hacı Ramin İgidov dedi.
Onun sözlərinə görə, son zamanlar tikilən məscidlərdə hansı
memarlıq üslubundan isdifadə olunduğu bilinmir.
"Təəssüflər olsun ki, son zamanlar tikilən məscidlərin
çoxunda hansı memarlıq üslubundan istifadə olunduğu bilinmir. Biz
belə düşünürük ki, burada Qafqazın spesifik memarlığı da Qafqaza
yaraşan tərzdə olmalıdır. Belə deyək ki, burada yaşayan insanların
qədim keçmişini ifadə etsin", - İgidov bildirdi.
Xatırladaq ki, 16 may tarixində Gürcüstan Parlamentində keçirilən
dini məsələlər üzrə işçi qrupunun görüşü zamanı bir sıra məsələlər:
orta məktəblərdə dini dərslərin keçirilməsi, dini məkanların
mülkiyyəti məsələsi və onların geriyə qaytarılması, din haqda qəbul
olunacaq yeni qanun və dini məkanların tikintisinə icazənin
verilməsində yaranan çətinliklər müzakirə olunub.