İsveçrə Parlamentinin sədri və İsveçrə Parlamentin üzvləri Marneulidə olublar
Bu
gün, 29 oktyabr tarixində İsveçrə Parlamentinin sədri Marina
Karobio Quşeti və İsveçrə Parlamentin üzvləri Marneuliyə
gəliblər.
Onların görüşü meriyadan başlayıb və “qadın
otağında” qonaq olublar. Qonaqlar daha sonra bələdiyyənin İctimai
Kitabxanasını ziyarət ediblər və bələdiyyə büdcəsinin
planlaşdırılmasında qadınların iştirakı və kəndlərdəki problemlərlə
tanış olublar. İsveçrə Parlamentinin sədri Marina Karobio Quşeti
bugünkü səfərinin əhəmiyyətindən söz açıb.
“Biz bu regionda müxtəlif layihələrin həyata
keçirilməsini dəstəkləyirik. Bizim əsas istiqamətimiz kənd
təsərrüfatının inkişafıdır. Eləcə də qadınların gücləndirilməsi və
onların fəallığı da bizim istiqamətə daxildir. Qadınlara iş
axtarması və yaxşı imkanlarının olması üçün kömək etdikdə biz
inanırıq ki, bu iqtisadi gəlirə də təsir göstərəcək və kasıblığın
aradan qaldırılmasına dəstək olacaq”, - Marina
Karobio Quşeti dedi.
Marneuli meri Zaur Darğallı düşünür ki, bugünkü səfər gələcək
əməkdaşlığa dəstək olacaq.
“İsveçrə hökumətinə təşəkkür etmək istəyirəm. Məhz
onların maliyyəsi və dəstəyi ilə Gürcüstanda çox layihələr həyata
keçirilir. Biz bu gün müsbət nümunələrdən biri idik ki, qadınların
iştirakı istiqamətində olan vəziyyətimizlə tanış oldular.
Çalışdığımız istiqamətlərlə bağlı fəaliyyətlərimizlə yerində tanış
oldular. Düşünürəm ki, bu vacib səfər idi. Çünki gələcəkdə müxtəlif
proqramların onlar tərəfindən dəstəklənməsi davam
edəcək”, - Zaur Darğallı dedi.
Marneuli Bələdiyyəsinin İctimai Kitabxanasında yerli hakimiyyət
qonaqlarla yanaşı həmçinin, yerli sahibkar qadınlarla da görüşüb.
İsveçrə hökumətinin nümayəndələri Marneulidən sonra pendir zavodunu
nəzərdən keçirmək üçün Rustaviyə yollanıb.
Bələdiyyə xidməti olan “qadın otağı” və pendir zavodları “Qafqaz
Alyansları Proqramı” çərçivəsində gücləndirilib və proqramı
İsveçrənin maliyyə dəstəyi ilə “Mersi Kor” həyata keçirir. “Qadın
otağı” dörd regionun 28 bələdiyyəsində fəaliyyət göstərir və artıq
kəndlərdə yaşayan 17,000 qadın müxtəlif növ xidmətlərdən
yararlanıb.