Meriyanın elan etdiyi tenderdə qalib gəlmiş şirkət Kirəç Muğanlıda fəhlələrin maaşını ödəmir
Artıq 7 aya yaxındır
ki, Kirəç Muğanlı kəndində içməli su xətti çəkilir. Kəndə çəkilən
su xətlərində işçi olaraq çalışan kənd sakinləri artıq 5 aydır ki,
maaşlarını ala bilmirlər.
Sakinlərin sözlərinə görə, daha əvvəl su xəttinin çəkilməsi başqa
şirkət tərəfindən həyata keçirilib. Sonra yenidən tenderin elan
olunması nəticəsində işlərin hayat keçirilməsi başqa bir şirkətə
həvalə olunub və xəttin çəkilməsində iştirak edən işçilər yeniləri
ilə əvəz olunublar. Sakinlər deyir ki, yeni işçilər gəldikdən sonra
əvvəllər xəttin çəkilməsində iştirak edən fəhlələrin,
traktorçuların və nəzarətçinin maaşı ödənilməyib.
“Öz ciblərindən yanacağa pul ödəyən, əziyyət çəkib
işləyən fəhlələrin pulu ödənmir. Hər yerə müraciət etmişik, amma
bir xəbər çıxmır”, – maaşını ala bilməyən kənd sakini
deyir.
Kənd sakinləri məsələ ilə bağlı Marneuli meri Zaur Darğallıya
məlumat verib və görüşüblər.
“Marneuli” radiosu ilə söhbəti zamanı Marneulinin meri Zaur
Darğallı bildirib ki, Kirəç Muğanlıda içməli suyun yenilənməsi ilə
bağlı yalnız bir şirkət “Milmşen” MMC çalışır və güman ki, bir aya
işləri başa vuracaq.
“Borclarla bağlı sakinlər bizim də yanımıza
gəlmişdilər. Məlumatımız var və tikintini aparanlara da xəbərdarlıq
etmişik ki, vətəndaşların maaşını versinlər”- Zaur
Darğallı deyir.
“Milmşen” şirkətinin direktoru “Marneuli” radiosu ilə söhbəti
zamanı bildirdi ki, o, ay yarımdır ki, şirkətin direktoru olaraq
təyin edilib və qeyd olunan faktla bağlı məlumatı yoxdur.
Direktorun sözlərinə görə, sakinlər köhnə borcları keçmiş şirkət
rəhbərindən tələb etməlidirlər.
“Mənim məlumatım yoxdur hansı borcdan söhbət gedir. Maaşımızı
almamışıq deyən əməkdaşlar köhnə direktorla birgə gəlməlidirlər və
işi müəyyən edərik”- “Milmşen” MMC-nin direktoru
deyir.
Qeyd edək ki, Kirəç Muğanlının ətraf ərazisində aparılan işlərlə
bağlı fəhlələrlə müqavilə bağlanmayıb.