Bu gün, 29 dekabr tarixində Abxaziya müharibəsində şəhid olmuş
Ənvər Hümbətovun adının əbədiləşdirilməsi üçün başladılan petisiya
Marneuli meriyasına təqdim olunub.
Petisiyanın təqdim olunmasında mülki fəallarla birlikdə Hümbətovun
ailə üzvləri də iştirak ediblər.
Bu barədə məlumatı “Marneuli” radiosu ilə söhbəti zamanı mülki fəal
Samirə Bayramova verdi. Onun sözlərinə görə, 1300 imza toplanıb və
Marneuli meriyasına təqdim olunacaq.
“Düzdür 2020-ci ildə petisiyanın başladığını elan
etmişdik. Sadəcə olaraq ölkədə pandemiya vəziyyəti olduğuna görə
heç bir şəkildə insanlarla görüşə bilmədik. İmza toplamaqla bağlı
problemlər oldu. Ancaq bu gün imzaları toplamışıq. Yerli
bələdiyyənin qanunvericiliyinə uyğun olaraq Marneuli sakinlərinin 1
faizinin imzası toplanılıb, hətta deyərdim ki, 200-300 imza da
əlavə toplanılıb. Hər hansı bir problem olarsa, etibarsız
sayılmasın deyə.”
Mülki fəal petisiyanın başladılma səbəbi haqqında da məlumat
verdi.
“Petisiyanı başlatmaqda əsas məqsəd yerli
azərbaycanlılar və gürcülər arasında həmrəylik yaratmaq və
inteqrasiya prosesinə dəstək olmaqdır. Yerli sakinlərdə
vətənpərvərliyin gücləndirilməsidir ki, bu gün Marneulidən olan
sakin Gürcüstan üçün vacib olan torpaqlarda vuruşub, canından
keçib, şəhid olub. Birgə, güclü Gürcüstan naminə təbii ki, biz
birlikdə addımlar atmalıyıq. Biz Marneuli sakinləri olaraq çox
təəssüf edirik ki, bu gün belə qəhrəman şəxsin adına nə küçə var,
nə də hər hansı bir memorialda ad-soyadı var. Təəssüf ki, imza
topladığım zamanlar kəndlərdə soruşurdular ki, – Kimdir?! Bizim heç
xəbərimiz yoxdur. Ancaq bu insan Gürcüstan tarixinin əsas
simalarından biridir.”
Bayramovanın sözlərinə görə, Ənvər Hümbətovun ailə üzvləri
petisiyanın təqdim olunmasından sonra Marneuli meriyasının meri,
Kənan Ömərov ilə görüşəcəklər. Samirə Bayramova deyir ki,
Hümbətovun ailə üzvlərindən Rustavidə də yaşayanlar var. Həmçinin
Hümbətov təhsilini Rustavi şəhərində 13 nömrəli məktəbdə davam
etdirdiyinə görə, o, Rustavi merinə də rəsmi müraciət
ünvanlayıb.
“Rustavi merliyinə də ərizə ilə müraciət etmişəm. Ənvər
Hümbətov Rustavi şəhərində, 13 nömrəli məktəbdə təhsilini davam
etdirib. Rustavi şəhərində, məktəbdə onun adına bir lövhə qoymaq və
eyni zamanda Rustavi şəhərində adını əbədiləşdirmək üçün hər hansı
bir fəaliyyətlərin həyata keçirilməsini Rustavi merindən xahiş
etdik. Hazırda danışıqlar gedir. Rejissorlarla da danışıqlar gedir
və onun haqqında sənədli film çəkilməsi də nəzərdə tutulur. Bu
haqda danışıqlar gedir və buna da nail olacağıq. Düşünürəm ki, bu
gün bizim azad və müstəqil Gürcüstanda yaşamağımızın səbəbi olan
insanların adını daima ucaltmalı və onları ucaltmalıyıq. Bu bizim
vicdan borcumuzdur.”
Məlumat üçün bildirək ki, Ənvər Hümbətov Marneulinin Algeti
kəndindəndir. O, Abxaziya müharibəsinin iştirakçısı olub. Hümbətov
müharibədə 25 nəfəri xilas etdiyi zaman şəhid olub.
Qeyd edək ki, Ənvər Hümbətov “Vaxtanq Qorqasali” ordeni ilə təltif
olunub. Bu isə hərbçilərə verilən ən yüksək ordendir.