29 dekabr tarixində Abxaziya müharibəsində şəhid olmuş Ənvər
Hümbətovun adının əbədiləşdirilməsi üçün başladılan petisiya
Marneuli meriyasına təqdim olunub.
Petisiyanın təqdimatında Hümbətovun ailə üzvləri də iştirak
edirdilər. Onlar petisiyanın təqdim olunmasından sonra Ənvər
Hüseynovun Marneulidə büstünün qoyulması və ya küçəyə adının
verilməsi mövzusu ilə bağlı Marneuli meri Kənan Ömərovla
görüşüblər.
Bu barədə məlumatı Hümbətovun qızı Ofeliya Hümbətova “Marneuli”
radiosuna təsdiq etdi.
O, görüşü müsbət dəyərləndirdi və razı qaldıqlarını bildirdi.
“Görüşümüz çox gözəl keçdi, ailəliklə çox razı qaldıq. Söz verildi
ki, nə ki işlər görülüb, imzalar toplanılıb, baxılacaq. Neçə
illərdir, gözlədik. Yenə gözləyirik, nəticəsini görərik. Bəzi
sözlər verilib və gözləyək, görək necə olacaq. Görüş yaxşı
oldu.”
Qeyd edək ki, Abxaziya müharibəsində şəhid olmuş Ənvər Hümbətovun
adının əbədiləşdirilməsi ilə bağlı petisiya mülki fəal Samirə
Bayramovanın təşəbbüsü ilə başladılıb. O, 29 dekabr tarixində
şəhidin ailə üzvləri ilə birlikdə Marneuli meriyasına petisiyanı
təqdim etmək üçün gedib. Lakin Bayramovanın Marneuli meri Kənan
Ömərov ilə görüşməsinə icazə verilməyib. Yalnız şəhidin ailə
üzvlərinə merlə görüşməyə icazə verilib.
Məlumat üçün bildirək ki, Ənvər Hümbətov Marneulinin Algeti
kəndindəndir. O, Abxaziya müharibəsinin iştirakçısı olub. Hümbətov
müharibədə 25 nəfəri xilas etdiyi zaman şəhid olub.
Ənvər Hümbətov “Vaxtanq Qorqasali” ordeni ilə təltif olunub. Bu isə
hərbçilərə verilən ən yüksək ordendir.
Petisiya ilə bağlı ətraflı məlumat üçün linkə daxil olun -
Link