საქართველოს მთავრობა მუშაობს საკანონმდებლო ინიციატივაზე, რომლის მიხედვითაც, 2000-მდე ადამიანს კოვიდპანდემიის დროს დაკისრებულ ჯარიმას ჩამოაწერენ. საკითხს მთავრობის სხდომაზე განიხილავენ, შემდეგ კი პარლამენტს გადაუგზავნიან.

პრემიერმა ირაკლი კობახიძემ განაცხადა, რომ ჯარიმის გადახდა აღარ მოუწევთ 1855 ადამიანსა და 38 კომპანიას. ჯამში საუბარია 5 600 000 ლარზე.

„უკვე რამდენიმე წელია, ჩვენს მოქალაქეებს რჩებათ ჯარიმები, რომელთა ამოღება, ჩვენი აზრით, სრულიად არაგონივრული იქნებოდა“, - თქვა ირაკლი კობახიძემ.

თითქმის ორი წელია, საქართველოში გაუქმებულია კოვიდრეგულაციები. პანდემიის დროს, 2020 წლის მარტიდან კი საქართველოში მკაცრი შეზღუდვები მოქმედებდა, მათ შორის იყო იზოლაციის, გადაადგილების, შეკრებების აკრძალვისა და პირბადის სავალდებულო გამოყენების შესახებ შეზღუდვები.

საქართველოს პარლამენტმა დაკისრებულ ჯარიმებზე ამნისტია 2021 წელსაც გამოაცხადა, თუმცა გარკვეული რეგულაციები მას შემდეგაც მოქმედებდა. ჯარიმები, რომელთა გაუქმებაზეც მთავრობის სხდომაზე მსჯელობენ, სწორედ ამ პერიოდის შემდეგ არის დაკისრებული.

---

„ქართული ოცნება“ კიდე ერთხელ აპირებს რუსული კანონის მიღებას, რომელიც 2023 წლის მარტში მასობრივი პროტესტის შედეგად უკან გაიწვიეს. „ქართულმა ოცნებამ“ გასულ წელს დადო პირობა, რომ რუსულ კანონს აღარ დაუბრუნდებოდნენ, მაგრამ პირობა დაარღვია. ქართულმა ოცნებამ კანონპროექტის პირვანდელი ფორმულირებიდან მხოლოდ სიტყვა "აგენტი" ამოიღო და ის უცხოური ძალის ინტერესების გამტარებლით შეცვალა.
კანონის მიხედვით, ყველა არასამთავრობო და მედიაორგანიზაცია, რომლის შემოსავლების 20%-ზე მეტი უცხოეთიდან არის მიღებული უცხოური ძალია ინტერესების გამტარებლად ჩაითვლება. სახელმწიფო არ გამოიკვლევს თუ რას საქმიანობენ და რა მიზნებს ემსახურებიან ეს ორგანიზაციები და მათ ყველას უცხოური ძალის ინტერესის გამტარებლად შერაცხავს.
კანონი მიმართულია ევროპასა და ამერიკისაგან შემოსულ დაფინანსებებზე და არა მტრულად განწყობილი ქვეყნებიდან შემოსულ დაფინანსებებზე, როგორც ეს ცივილიზებულ ქვეყნებშია.
კანონის ინიცირების გამო შეშფოთება გამოთქვეს ევროკავშირის წევრმა და საქართველოს მეგობარი ქვეყნების ლიდერებმა, რუსეთის პრეზიდენტის პრესმდივანმა კი „ქართული ოცნების“ კანონი მოიწონა.