ადიგენის მუნიციპალიტეტის ერთ-ერთი ყველაზე დიდ სოფელში მეწყრული პროცესები განვითარდა. სოფელ უდეში გეოლოგები მუშაობენ.

როგორც რადიო თავისუფლებას მუნიციპალიტეტის მერმა გოჩა ქიმაძემ უთხრა, მეწყრული პროცესები განვითარდა სოფლის ერთ-ერთ უბანთან ("პირდაპირები"), რომელშიც დაახლოებით 20 ოჯახი ცხოვრობს. მერის ინფორმაციით, საცხოვრებლად უვარგისია ერთი საცხოვრებელი სახლი და გასახლება შეიძლება შეეხოს დამატებით ოთხ ან ხუთ ოჯახს.

"გეოლოგები მუშაობენ და შემდეგ გვეცოდინება, რამდენად იქნება მოსახლეობის გაყვანა საჭირო - მზად გვაქვს ფართი, სადაც შეგვიძლია მათი გადაყვანა... ბოლო სამი-ოთხი დღეა, რაც შევნიშნეთ და დროული რეაგირება მოხდა", - ამბობს გოჩა ქიმაძე.




სოფელში, რომელშიც დაახლოებით 1800 ოჯახი ცხოვრობს, მეწყრული პროცესების განვითარება პროგნოზირებულია "გარემოს ეროვნული სააგენტოს" საინფორმაციო ბიულეტენში, რომელიც 2023 წელში მოსალოდნელ მეწყრულ პროცესებზე წერია.

"პერიოდული აქტიურობით გამოირჩევა სოფელში განვითარებული 2 მეწყრული უბანი. პირველ უბანზე, რომლის ფართობი 15,2 ჰექტარია, გასულ წლებში დააზიანა 120-მდე საცხოვრებელი სახლი, სრულად დაინგრა 9, მათ შორის საავადმყოფოს შენობა. ამჟამად საფრთხის ქვეშაა ხიმინჯებზე დამონტაჟებული გაზსადენის მილი", - წერია დოკუმენტში სოფელ უდეზე.

ამავე ბიულეტენის მიხედვით, მუნიციპალიტეტში არის 16 მეწყრული უბანი, ქვათაცვენის 9 უბანი, ჩამონაშალის 1, გვერდითი ეროზიის 1, ინფრასტრუქტურის 22 ობიექტი და 17 საცხოვრებელი სახლი.