Bu gün, 19 oktyabr tarixində Marneulidə fəaliyyət göstərən
"Azərbaycan Evi"ndə (keçmiş adı AtaHolding) Azərbaycan
Respublikasının Müstəqilliyinin Bərpası Gününə həsr olunmuş tədbir
keçirildi.
Tədbirdə Azərbaycan Respublikasının Diasporla İş üzrə Dövlət
Komitəsinin üzvləri, TİKA təşkilatının nümayəndələri, gənclər və
dəvət olunmuş qonaqlar iştirak edirdilər. Görüşü giriş sözü ilə
"Azərbaycanlıların İnteqrasiya Mərkəzi"nin icraçı direktoru Orxan
Pirverdiyev açaraq qonaqları və tədbir iştirakçılarını salamladı.
O, tədbir iştirakçılarına Azərbaycanın Müstəqilliyinin Bərpası Günü
ilə bağlı məlumat verdi.
Daha sonra çıxış üçün sözü Azərbaycan Diasporla İş üzrə Dövlət
Komitəsinin üzvü Vüsal Məmmədova verdi. O, çıxışında Azərbaycan
müstəqilliyini necə əldə etdiyini və hansı çətin şəraitdə qoruyub
saxladığı haqda danışdı. Məmmədov ikinci Qarabağ müharibəsindən də
danışdı və Azəbaycanın qələbəsi haqda iştirakçılara məlumat verdi.
O, bildirdi ki, ikinci Qarabağ müharibəsi zamanı Azərbaycan öz qanı
bahasına ərazilərini bərpa etdi.
Tədbirdə Qarabağ müharibəsi zamanı dünyasını dəyişmiş şəhidlərin
ruhları bir dəqiqəlik sükutla yad edildi.
Görüşün növbəti hissəsində "Vətəndaşların hüquqları və etnik
azlıqların ictimai fəallığı" haqında seminar da keçirildi. Seminarı
Əli Bədirov və Orxan Pirverdiyev təqdim etdi. Onlar vətəndaş
hüquqları və ictimai fəallıq haqda tədbir iştirakçılarına məlumat
verdilər.
Görüş müzakirə formasında davam etdi.