Tbilisidəki Mirzə Fətəli Axundov adına Azərbaycan Mədəniyyəti
Mərkəzində Azərbaycanın Xalq artisti, görkəmli bəstəkar Tofiq
Quliyevin 105 illik yubileyi qeyd edilib.
Yubiley münasibətilə muzeydə maraqlı konsert proqramı təqdim
olunub.
Tədbirdə Azərbaycanın Gürcüstandakı səfirliyinin əməkdaşları, gürcü
və azərbaycanlı ictimaiyyət nümayəndələri, musiqiçilər və gənclər
iştirak ediblər.
Muzeyin əməkdaşı Leyla Əliyeva tədbiri açaraq Tofiq Quliyevin həyat
və yaradıcılığı barədə məlumat verib.
Sonra Azərbaycanın Gürcüstandakı səfirliyinin məsul əməkdaşı Anar
Rəsulov Xalq artistinin yaradıcılığında Vətənə, xalqa sevginin
tərənnüm olunmasından danışıb. Bildirib ki, Tofiq Quliyevin 105
illik yubileyinin Tbilisidə də qeyd olunması Azərbaycan ilə
Gürcüstan arasındakı mədəni əlaqələrin yüksək səviyyədə olduğunu
sübut edir.
Sonra Azərbaycan xalqının ümummilli lideri Heydər Əliyevin Tofiq
Quliyevin 80 illik yubileyində bəstəkar haqqında söylədiyi
fikirlərin lent yazısı nümayiş etdirilib.
Xatirə gecəsində azərbaycanlı və gürcü incəsənət nümayəndələri Xalq
artistinin mahnılarını və bəstələrini ifa ediblər.
Tədbir çərçivəsində tamaşaçılara “Vals” rəqsi təqdim olunub.
Konsertin ikinci hissəsində 8 Noyabr – Zəfər Günü münasibətilə
vətənpərvərlik mövzusunda mahnılar ifa olunub.
Mənbə: azertac.az