Bu gün, 8 dekabr tarixində Tbilisi Apelyasiya Məhkəməsinin hakimi
Leila Mamulaşvili Marneuli büdcəsindən dini təşkilatların
maliyyələşdirilməsi məsələsi ilə bağlı Bolnisi Rayon Məhkəməsinin
qərarını ləğv edib.
Sosial Ədalət Mərkəzinin hüquqşünası Tatia Kaçarava “Marneuli”
radiosu ilə söhbəti zamanı bildirdi ki, bu gün məhkəmənin birinci
iclası təyin edilibmiş. Hakim isə işin materiallarını birinci
iclasdaca müzakirə edərək qərarı da elan edib.
“Bu gün məhkəmə dedi ki, dini təşkilatlar üçün pulun bu
qaydada bölünməsi qanunidir və Bolnisi Rayon Məhkəməsinin qərarını
ləğv etdi. Çox qəribə idi ki, iclas belə tez təyin edildi, bir
iclasda müzakirə olundu, araşdırıldı və qərar elan edildi. Qəribə
təsadüfdür ki, Marneuli indi 2023-cü ilin büdcəsi üzərində işləyir.
Layihə artıq yayımlanıb və bu günlərdə təsdiq edilməlidir. Biz bir
neçə gün əvvəl təəccüblə yazdıq ki, büdcədə niyə yenidən pullar
eyni şəkildə bölünüb, Bolnisi məhkəməsi bunu diskriminasiya hesab
etmişdi. Tələb etdik ki, məhkəməyə qarşı belə hörmətsizlik
etməsinlər və həmin səhv yenidən təkrar olunmasın. Bunların hamısı
baş verən halda, indi niyəsə Bolnisi Mhkəməsinin bu qərarı ləğv
olundu”, – Tatia Kaçarava bildirdi.
Bolnisi Rayon Məhkəməsi Marneulinin büdcəsindən dini təşkilatlar
üçün pul ayrılmasını 2022-ci ilin 1iyulunda diskriminasiya olaraq
qiymətləndirib. Marneuli yerli özünüidarəsi Bolnisi Rayon
Məhkəməsinin qərarını Apelyasiya Məhkəməsinə şikayət edib. Məsələ
2019-cu ildə başlanmış işlə bağlıdır. Şikayət edənlər Marneulili
mülki fəal Samirə Bayramova və Bütün Gürücstan Müsəlmanları Ali
Dini İdarəsinin sədri Şeyx Mirtağı Əsədovdur.
Samirə Bayramova “Marneuli” radiosu ilə söhbəti zamanı bildirdi ki,
o, hakimdən belə qərarı gözləyirdi. Çünki iclası başlayandan hakim
Mamulaşvili onların arqumentini dinləmirmiş və özü diskriminasiya
xarakterli şərhlər edirmiş.
“Düzünü desəm, başdan da hiss etmişdim ki, hakim,
ümumiyyətlə, proses zamanı bizi dinləmirdi. Həmçinin, bu adam
özünün fərqli yanaşmaları ilə seçilirdi. Hakim mənə elə sual verdi
ki, bu Apelyasiya Məhkəməsinin hakimi üçün uyğun deyil. O, məndən
soruşdu ki, Azərbaycan xristian təşkilatlarını maliyyələşdirirmi,
Azərbaycanda bu baxımdan nə baş verir? Mən deyəndə ki, bunu niyə
soruşur, o, dedi ki, axı sən etnik azərbaycanlısan. Bu mənim üçün
təhqir idi. Onun münasibətindən görünürdü ki, bizi bu ölkənin
hissəsi hesab etmir. Təəssüf ki, bu gün Apelyasiya Məhkəməsi
Bolnisi Rayon Məhkəməsinin qərarını etibarsız hesab
etdi”.
Marneulili mülki fəalın sözlərinə görə, Apelyasiya Məhkəməsinin
hakim Leila Mamulaşvilinin qərarını mütləq şikayət edəcəklər.
Marneuli bələdiyyə büdcəsindən hər il Marneuli və Hucabi
Yeparxiyasına 400 000 lari ayrılır. Şikayətçilərin əsas tələbi
yerli özünüidarə səviyyəsində dini təşkilatların
maliyyələşdirilməsinin dayandırılması idi. Çünki Bayramovanın
dediyinə görə, dini təşkilatlar artıq mərkəzi büdcədən
maliyyələşdirilirlər.